Олий Мажлис Қонунчилик палатаси спикери ўринбосари, «Миллий тикланиш» демократик партияси раҳбари Алишер Қодиров рекламаларда давлат тили оёқости қилинаётгани етмагандек, унда ҳаёсизлик ва порнография элементлари борлигини кескин танқид қилди.
«Биз Европа эмасмиз. Рекламада давлат тили оёқости қилингани етмагандек, ҳаёсизлик ва порнография элементлари ҳам бемалол бўлиб қолди. Буни нормал ҳолат сифатида қабул қилиш мумкин эмас! Рекламанинг мазмуни ва шакли тубдан қайта кўриб чиқилиши керак», — деб ёзади Қодиров.
Унинг маълум қилишича, «Миллий тикланиш» партияси «Реклама тўғрисида»ги қонунни янги таҳрирда кўриб чиқишни бошлаган.
Аввалроқ «Миллий тикланиш» ва «Адолат» партиялари ҳокимият вакилларининг қонуний талабларига фаол бўйсунмаслик, оммавий тартибсизликлар ва фуқароларга нисбатан зўравонлик ишлатишга даъватлар учун жиноий жавобгарликни жорий этиш борасидаги қонун лойиҳаси ташаббуси билан чиққан эди. Алишер Қодиров Жиноят ва Маъмурий жавобгарлик тўғрисидаги кодексларга, шунингдек, «Ахборотлаштириш тўғрисида»ги қонунга киритилиши режалаштирилаётган ўзгартиришлар борасидаги фикр билдириб, «эркин сўз жамиятнинг хотиржам ривожланишига халақит бермаслиги керак» — деганди.
Изоҳ (0)