Gallup томонидан анъанавий равишда эълон қилинадиган дунёнинг бахтли мамлакатлари рейтингида Ўзбекистон 42-ўринни эгаллади. Бу ҳақда 19 март куни эълон қилинган World Happiness Report 2021 ҳисоботида қайд этилган.
Тадқиқот муаллифларининг таъкидлашича, бу йилги ҳисоботда COVID-19 пандемиясининг оқибатлари ва унинг турмуш даражасига таъсирига эътибор қаратилди.
Финляндия рейтингда қаторасига тўртинчи йил етакчилик қилмоқда. Энг бахтли мамлакатлар учлигидан, шунингдек, Исландия ва Дания ўрин олди. Ундан кенйинги ўринларни Швейцария, Нидерландия, Швеция, Германия, Норвегия ва Янги Зеландия эгаллади.
Ўзбекистон рейтингда 149 мамлакат орасида 42-ўриндан жой олди. 2020 йилги рейтингда Ўзбекистон 38-ўринни эгаллаганди. Қўшни мамлакатлардан Қозоғистон — 45, Қирғизистон — 67, Тожикистон — 78, Туркманистон эса 97-ўринда қайд этилган.
Рейтингда охирги ўринларни Руанда, Зимбабве ва Афғонистон эгаллаган.
Маълумот учун, World Happiness Report (Бахтиёрлик тўғрисидаги ҳисобот) БМТнинг барқарор ривожланиш ечимларини излаш бўлими томонидан ҳар йили тузиб келинади. Ушбу ҳисобот ва рейтинг 2012 йилдан бери эълон қилиб борилади.
Изоҳ (0)