Президент Шавкат Мирзиёев 19 март куни халқ депутатлари Тошкент вилояти кенгашининг навбатдан ташқари сессиясида ҳудуднинг ирригация тизими, бу йўналишда ҳокимларнинг фаолияти ҳамда Чорвоқ сув омбори ресурсларини тежаш зарурлигига тўхталиб ўтди, дея хабар бермоқда «Gazeta.uz».
«Тошкент вилояти — бу Сурхондарё вилояти эмас, Қашқадарё вилояти эмас. Бу Тошкент вилояти. Мен кеча топшириқ бердим: кластерлар ҳокимият билан шартнома қилади. Шартнома шундан иборат бўладики, кластернинг эртанги ривожланиши, ҳисоб-китоби, режалари чуқур қайта кўриб чиқилади. Пахтани қайта ишлаб чиқариш ва бошқалар инновацион инвестиция олиб келишга асос бўлади. Мана шуни ҳам ҳаммаларинг билиб олишларинг керак», — деди давлат раҳбари.
Президентнинг таъкидлашича, Бўка, Бекобод, Юқори Чирчиқ, Оҳангарон туманларида «ерга қараб бўлмайди», зовурлари қазилмаган, мавжудлари ҳам тўлиб қолган.
«Бу ерда ҳоким бўлиб ишлаган оқсоқоллар ўтирибди. Ўзи ерни ким заҳарлайди? Сув заҳарлайди. Мана мен 1 миллиард куб метрга яқин сувни иқтисод қилиш бўйича топшириқ бердим. Энди Чорвоқда сувни очишмайди. Ўзини энг катта агроном деб ҳисоблайдиган ҳокимлар энди сувни очишни сўрайди. Лекин бунинг учун ҳисоб-китоб қилиш керак», — деди Шавкат Мирзиёев.
У Чиноз туманида қарийб 1000 гектар ерни ўзлаштирган ва ўзи техника олиб келган тадбиркор ҳақида сўзлаб берди. Ташриф арафасида Президент Янгиободдаги жами 202 минг куб метр сиғимга эга 3 та сув ҳавзаси барпо этилган ва экинларни томчилатиб суғориш йўлга қўйилган экин майдонларини бориб кўрган эди.
«Бориб кўриб келинглар. Тадбиркор давлатдан ёрдам олмаган, биз ҳам ёрдам берганимиз йўқ. 1,5 миллион доллар кредит олиб, техника келтирган. ‘Шавкат Миромонович, жаноб Президент, агар сиз менга салгина ёрдам берсангиз, бу йилнинг ўзида 50 центнер [пахта] оламан’, деяпти. Экилмаган, сув йўқ жойдан. А нимага сиз, ‘мардлик қилмаган’ жаноб ҳокимлар бориб кўриб келмайсиз? Ёқмайди-да сизларга?! Сизларга фақат Чорвоқни очиб берса. Канал сувга тўлса, кейин 24 соат сув оқади. Сиз ҳаттоки икки соат ҳам сувни назорат қилмайсиз», — деб қўшимча қилди у.
Президент раислигида ўтган йиғилишда 2021 йилги суғориш мавсумида сув таъминоти 25 фоиз кам бўлиши кутилаётгани айтилган. Шу боис, 430 минг гектарда сув тежовчи технологияларни жорий қилиш орқали 3 миллиард кубометр сувни тежаш лозимлиги таъкидланди.
Бундан аввал Шавкат Мирзиёев Нурафшон шаҳрида амалга оширилаётган лойиҳалар билан танишгани, Чирчиқ шаҳар «тўртлиги»ни нега ишдан олмаганини айтгани ҳамда Тошкент вилояти иккига бўлиниши мумкинлигини маълум қилгани ҳақида хабар берилганди.
Изоҳ (0)