Испания парламенти эвтаназияни қонунийлаштирди. Бу ҳақида Reutersга таяниб, Meduza хабар берди.
Мамлакат аҳолисининг 18 ёшдан ошган қисми эвтаназия ҳуқуқидан фойдаланиши мумкин. Бунинг учун улар чидаб бўлмас оғриқларни келтириб чиқарадиган жиддий ёки давоси йўқ касалликка чалинган бўлиши керак. Эвтаназияни амалга ошириш учун бемор камида 15 кунлик оралиқ билан иккита сўров юбориши керак.
Қонунга кўра, эвтаназия шифокор томонидан амалга оширилиши ёки беморнинг ўзи бошқа бир кишининг ёрдами билан бажариши мумкин. Ҳужжат муолажани рад этиш ҳуқуқини шифокорларда сақлаб қолади.
Қонун июнь ойида кучга кириши кутилмоқда.
Испания эвтаназияни қонунийлаштирган дунёдаги олтинчи, Европадаги тўртинчи давлатга айланди. Бунгача эвтаназия Бельгия, Люксембург, Нидерландия, Канада ва Колумбияда, шунингдек, АҚШнинг бир нечта штатида қонунийлаштирилган.
2021 йилнинг январь ойида Португалия ҳам эвтаназияни қонунийлаштириш бўйича қарор қабул қилди, лекин 16 март куни конституциявий суд буни мамлакатнинг асосий қонунларига зид деб топди. Қонун лойиҳаси парламентга қайта киритилди, энди унга баъзи ўзгартиришлар киритилади.
Маълумот учун, эвтаназия оғир ёки давоси йўқ касалликка чалинган ва бу касаллик натижасида чидаб бўлмас оғриқларни бошдан кечираётган одамнинг ҳаётига нуқта қўйиш амалиёти ҳисобланади.
Изоҳ (0)