18 март куни соат 9:20 атрофида Сирдарё вилояти Боёвут туманида кучли шамол эсиши кузатилди. Бу ҳақда вилоят ҳокимлиги матбуот хизмати хабар берди.
Шамол оқибатида «Халқ банки» филиали биносининг том қисми қулаб тушган. Учиб кетган том қисми бинонинг жануби-ғарбий, одатда, фуқаролар бўлмайдиган қисмига тушган, жабрланганлар йўқ.
Ҳодиса оқибатда Боёвут туманидаги «Соҳил», «Беруний», «Учтургон» ва «Алишер Навоий» маҳаллаларига йўналтирилган тармоқ электр энергия узатишдан вақтинча узилгани айтилмоқда. Бундан ташқари, дарахтнинг шамол таъсирида қулаши натижасида «Маданият», «Учтургон» ва «Олмазор» маҳаллаларида ҳам электр энергия узатиш вақтинча тўхтатилган.
Юзага келган ноқулайликлар бугун соат 15:00 га қадар бартараф этилиши таъкидланмоқда.
Шунингдек, вилоятнинг Ховос тумани «Соҳибкор» МФЙда жойлашган 11-уйнинг том ёпилмалари кучли шамол оқибатида учиб тушган.
Telegram’даги гидрометерологик илмий таҳлиллар, об-ҳаво башоратлари, тадқиқотлар, маърузалар канали 18 март тонгида Тошкент вилояти Бекобод туманида кучли шамол бўлиши ҳақида ёзган эди. «Бу Бекобод ёки Ховос шамоллари дейилиб, унинг йўналиши шарқдан ғарбга томон йўналганига шарқий шамол ҳисобланади. Одатда, Бекобод шамоллари баҳор-ёз ойлари антициклон перифериясининг охирги босқичида юзага келади. Ёзда эсган шамол қум-чангли бўлиб, қишлоқ хўжалиги экинларига зарар келтиради. Шамолнинг максимал тезлиги 28 метр/сониягача кучайиши мумкин», — дейилади хабарда.
Эслатиб ўтамиз, 30 январь куни Ховос туманида кузатилган кучли шамол 2019 йилда капитал таъмирланган бинонинг томини учириб юборган эди.
Изоҳ (0)