Turkiya Tashqi ishlar vazirligi Gretsiya va Isroil elchixonalariga, shuningdek, Yevropa Ittifoqi delegatsiyasiga diplomatik nota yubordi. Bu haqda Tengrinews xabar berdi.
Unda aytilishicha, ushbu mamlakatlar tomonidan EuroAsia Interconnector loyihasi doirasida yaratilayotgan elektr tarmog‘i Turkiyaning suvli hududlaridan o‘tadi. Loyihaning ko‘rgazmali hujjatlari shuni ko‘rsatdiki, rejalashtirilgan suvosti elektr kabeli yo‘nalishi Turkiyaning Sharqiy O‘rta Yer dengizidagi kontinental maydonini o‘z ichiga oladi.
Turkiya ushbu davlatlarning har qanday xatti-harakatlari faqat Anqaraning roziligi bilan amalga oshirilishi kerakligini bildirdi va tegishli diplomatik tuzilmalarga norozilik notasini yubordi. Notada kabel yotqizilishidan oldin dastlabki tadqiqotlar o‘tkazish va buning uchun ruxsat olish kerakligi, agar tadqiqotga zarurat bo‘lmasa, bu haqda Anqarani belgilangan tartibda xabardor qilish lozimligi qayd etilgan.
Turkiya matbuotidagi xabarlarga ko‘ra, Anqaraning bunday harakati 8-mart kuni Kipr, Gretsiya va Isroil o‘rtasida imzolangan bitimga javoban qilingan.
Ma’lumot uchun, 2020-yil oxirida Yevropa Ittifoqi O‘rta Yer dengizi mintaqasidagi xatti-harakatlari sababli Turkiyaga qarshi og‘ir sanksiyalar joriy qilish to‘g‘risida qaror qabul qilgan edi.
Avvalroq Rossiya prezidenti Vladimir Putin va Turkiya prezidenti Rajab Toyyib Erdo‘g‘on videokonferensaloqa rejimida Turkiyadagi “Akkuyu” atom elektr stansiyasining (AES) uchinchi energiya bloki qurilishiga start bergan edi. Turkiya prezidenti stansiyaning so‘nggi blokini qurish 2022-yilga rejalashtirilganini ma’lum qilgan.
Shuningdek, Fransiya prezidenti Emmanuel Makron Erdo‘g‘onga yarashib olish taklifini bildirib, xat yo‘llagani haqida xabar berilgandi. Turkiya TIV rahbarining ta’kidlashicha, Erdo‘g‘on Makronning maktubiga ijobiy munosabat bildirgan.
Izoh (0)