Ижтимоий тармоқларда 8 март куни Тошкентнинг Дўмбиробод даҳасидаги чорраҳаларнинг бирида юзага келган тирбандликни бартараф қилган болакай акс этган видео тарқалди. Унда 11 ёшли бола чорраҳа ўртасида транспортларнинг ҳаракатини махсус таёқча – жезл ёрдамида тартибга солаётганини кўриш мумкин.
Ушбу воқеадан сўнг Ички ишлар вазирлиги Йўл ҳаракати хавфсизлиги бош бошқармаси чорраҳани тартибга солган болани суҳбатга чақирди.
Боланинг исми Жавлонбек Турғунов бўлиб, у 232-мактабнинг 5-синфида ўқийди. Жавлонбекнинг таъкидлашича, у аввалдан ички ишлар ходими бўлишга, уларнинг кийимлари ва тирбандликларни бартараф этишга қизиққан.
Жавлонбек ўша кунги бўлган воқеани қуйидагича сўзлаб берди:
«8 март куни эди. Дўстим билан дўконга чиққан эдик. Шунда чорраҳада тирбандлик юзага келган экан. Тирбандликларни бартараф этишга қизиққаним боис йўлни тартибга келтиришни бошладим. Жезлни қассобхонадагилар берди. Улар эса машиналар тўхташ жойида ишловчи ходимдан олишганди», – дейди у.
Жавлонбекнинг айтишича, у ЙПХ ходимининг чорраҳада қўллайдиган ҳаракатларини бошланғич синфдаги Йўл ҳаракати хавфсизлиги дарсида ўрганган. Дарс вақтида ички ишлар ходимлари мактабга келиб, уларга амалий машғулотлар ҳам ўтган.
Бундан аввал ИИВ ЙҲХББ интернетда Қашқадарёда ЙПХ автомобили ёниб кетгани тўғрисидаги хабарларга ойдинлик киритгани, инстаблогер Дониёр Қаюмовнинг Malibu’си рухсатсиз «тонировка» қилингани учун жарима майдончасига олиб кетилгани ҳамда Сирдарёда ички ишлар ходими кийимида рақсга тушган йигит 8 суткага қамалгани ҳақида хабар берилганди.
Изоҳ (0)