Бухоро вилоятида Фуқаролик ишлари бўйича Когон туманлараро суди қарори билан 100 ой, яъни 9 йил давомида фарзандининг моддий таъминотидан бўйин товлаб юрган фуқаро 15 суткага қамалди. Бу ҳақда «Дарё»га МИБнинг Когон шаҳар бўлими бошлиғи Шамшод Мирзаев хабар берди.
Таъкидланишича, қарздор М.Х. 2012 йилнинг октябрь ойидан 2021 йилнинг 1 мартига қадар 100 ой учун 32 миллион 728 минг сўм алимент тўловларини тўлашдан қасддан бўйин товлаб келган.
Фуқаролик ишлари бўйича Когон туманлараро судининг 2012 йил 23 октябрдаги қарорига кўра, у турмуш ўртоғи Н.Қ. фойдасига икки нафар вояга етмаган фарзандининг моддий таъминоти учун ҳар ойлик иш ҳақи ва бошқа даромадларининг учдан бир қисмидан кам бўлмаган миқдорда алимент тўлаши лозимлиги белгиланган.
МИБ Когон шаҳар бўлими томонидан фуқаро М.Х. бир неча маротаба ўз вақтида фарзандлари моддий таъминотини бажариши юзасидан огоҳлантирилган. Бироқ М.Х. турли баҳона-важлар билан алимент тўламасдан, яшириниб юрган. Қидирув тадбирлари натижасида ушланган отага нисбатан маъмурий баённома расмийлаштирилган.
Когон шаҳар судининг очиқ суд мажлисида ҳуқуқбузарнинг ғайриқонуний ҳаракатлари МИБ Когон шаҳар бўлими томонидан Маъмурий жавобгарлик тўғрисидаги кодекс билан билан малакаланган. Ва отага нисбатан 15 сутка маъмурий қамоқ жазоси тайинланган.
«Фуқаро М.Х.нинг ўн беш сутка маъмурий қамоққа олингани унинг келгусида алиментдан келиб чиққан қарздорлигини тўлашдан озод қилмайди», — деди Шамшод Мирзаев.
Изоҳ (0)