Қашқадарё вилоятининг Чироқчи туманида 43 ёшли аёл куйиш аломатлари билан ўлик ҳолда топилди. Бу ҳақда «Дарё»га хабар берган марҳуманинг яқинларига кўра, аёл ўлдирилиб, кейин ёқиб юборилган.
«Бундай шубҳага боришимизнинг сабаби оддий. Қайнсинглим ёниб кетиши оқибатида ўлган бўлса, нега сочлари умуман ёнмаган? Қолаверса, оёқ кийимлари ҳам бутун турибди. Ҳатто олов ҳам ўтмаган. Одатда одам ёнгач бақириб ҳар томонга чопади-ку. Раҳматли, худди тандирда куйгандек жизғанак бўлиб турибди. Ўладиган даражада ёнмаган. Юзи таниб бўладиган даражада шунчаки куйган», — дейди марҳуманинг келинойиси Гулнора Нормўминова.
Гулнора Нормўминованинг айтишича, нохуш хабарни эшитгач воқеа жойига тезда етиб борган.
«Қайнсинглимнинг қайнанаси Хосият момодан ‘Нега бундай бўлди, жанжал бўлганмиди?’, деб сўрадим. Хосият момо ‘Йўқ, жанжал бўлгани йўқ. Кечки пайт эри келганди, манти сузиб берди. Шунда эри бунга қорним тўймади. Гўшт қовуриб берсин, деганди. Кейин қизи гўшт қовуриш учун ташқарига чиққанди, шунда қўрада (молхона) олов ёнаётганини кўрган. Ҳаммамиз югуриб чиқдик. Чиққанимизда келиним ёнаётган экан. Шу пайт моможон, деди-ю, ўзини ташлаб юборди, деди», — дейди Гулнора Нормўминова.
«Воқеа ҳақида эшитдим-у, тезда етиб бордим. Борсам, болам бечора ерда ётган экан. Ушлаб кўрсам, яхлаб, қотиб қолган. Ёнган одамнинг иссиқ тафти бўлмайдими? Бирдан қотиб қолмайди-ку. Қолаверса, ёнган одам жон ҳолатида қочмайдими? Менинг болам ёниб, ўша жойнинг ўзида ўлиб қоладими? Аслида, улар қизимни ўзлари ўлдириб қўйиб, кейин ёқиб юборган», — дейди Мусаллам момо Ҳожимуродова.
Мусаллам момонинг айтишича, қизининг жасади шунчаки куйган.
«Қизимнинг ўлганига ишонмай, қайта-қайта ушлаб кўрдим. Шунчаки куйган. Ўлиб қоладиган даражада ёнмаган. Энг ёмони, менинг қизим ўлиб кетди. Уни ўлдирганлар эса юрибди», — дейди марҳуманинг онаси.
Марҳуманинг акаси Ҳусанмурод Юсуповнинг айтишича, синглиси ва куёви ҳеч қачон яхши яшамаган. Куёви ҳар доим синглисини ҳақоратлаб, камситиб келган. Улар эса синглисининг оиласи тинчлигини ўйлаб, бунга кўз юмиб яшаган.
«Воқеани эшитишим билан тезда етиб бордим. Борсам, синглим ўлиб ётган экан. Қайнонасига қараб, ‘ахири едингми’, дедим. Улар эса қочиб уйига кириб кетди», — дейди марҳуманинг акаси.
Марҳуманинг ака-укаси Ҳусанмурод ҳамда Музаффар Юсуповларнинг айтишича, мазкур ишни ўрганаётган туман прокуратураси адолатли иш олиб бормаяпти.
«Биз вилоят прокуратурасига шикоят қилиб, ишни туман кўрмаслигини сўраяпмиз. Боиси Илҳом исмли терговчи мазкур ишга жудаям эътиборсиз ёндашяпти. Унинг олдига бориб, иш қачон судга ошади, десам, ҳали бизнинг уч ой вақтимиз бор, деди. Терговчи ишни шу даражада секин ва бамайлихотир олиб боряптики, ҳатто прокуратурага келган экспертиза хулосасини ҳам ўқиб кўрмаган экан. Қачон ўқийсиз ва бизга хабар берасиз, деб сўрасам, бизнинг вақтимиз бемалол, деди», — дейди Ҳусанмурод Юсупов.
Марҳуманинг яқинлари, шунингдек, мазкур жиноят ишини тергов қилаётган терговчи марҳуманинг қайноғаси — куёвнинг акаси билан бирга юрганини кўрганини, шу сабаб тергов шаффоф ўтишига гумон қилаётганини айтмоқда.
Мазкур воқеа хусусида Қашқадарё вилоят прокуратурасидан ахборот сўраганимизда прокуратура ахборот хизмати раҳбари Жасур Шукуров таҳририят томонидан ёзма мурожаат тақдим қилиниши лозимлигини, йўқса оғзаки сўровга жавобан ахборот берилмаслигини билдирди. Шукуров бу талаб Бош прокуратура томонидан айтилганини қўшимча қилди.
Сўнгра мазкур вазиятга ойдинлик киритиш мақсадида Бош прокуратура ахборот хизмати раҳбари Ҳаёт Шамсутдинов билан боғландик. Бош прокуратура ахборот хизмати раҳбарининг таъкидлашича, таҳририят сўрови ёзма бўлиши мумкинлиги ҳақида ҳеч қандай талаб қўйилмаган.
«Дарё» мухбирининг оғзаки сўровига жавобан Ҳаёт Шамсутдинов томонидан тақдим этилган маълумотга кўра, 2021 йилнинг 16 январь куни соат 19:00 да Чироқчи туманининг Оқтўнли қишлоғида яшаган Н.Ю. номаълум сабаб билан молхонасининг кириш эшиги олдида устига солярка сепиб, ўзини ёқиб юборган ва бутун тана аъзоларининг куйиш жароҳати билан воқеа жойида вафот этган.
43 ёшли Н.Ю.нинг ўз жонига қасд қилиб вафот этганлиги ҳолати бўйича Чироқчи тумани прокуратураси томонидан Жиноят кодексининг 103-моддаси 1-қисми (ўзини ўзи ўлдириш даражасига етказиш) билан жиноят иши қўзғатилган. Марҳума Н.Ю.нинг ўлими юзасидан судга оид тиббиёт экспертизаси, шунингдек, унинг руҳий ҳолатини аниқлаш учун суд психология экспертизаси тайинланган.
Бош прокуратуранинг қўшимча қилишича, жиноят иши бўйича Чироқчи тумани ИИБ ҳамда туман маҳалла ва оилани қўллаб-қувватлаш бўлими масъул ходимларининг ҳаракатлари юзасидан хизмат текширувлари тайинланган. Ҳозирда тергов ҳаракатлари Чироқчи тумани прокуратураси томонидан олиб борилмоқда.
Изоҳ (0)