Россияда коронавируснинг бир қатор штаммларини, шу жумладан, «британча» штаммни аниқлаш учун тест тизими рўйхатдан ўтказилди. Бу ҳақда соғлиқни сақлаш вазири Михаил Мурашкога таяниб «Коммерсантъ» хабар берди.
«Британча» штамм коронавируснинг бошқа турларига қараганда тезроқ тарқалади. Россияда бу штамм билан касалланиш ҳолати биринчи марта январь ойида рўйхатга олинган.
«Бугун коронавируснинг бир қанча штаммларини, хусусан, ‘британча’ штаммни аниқловчи тест тизими рўйхатдан ўтказилди», — деди Мурашко Давлат думасининг соғлиқни сақлаш қўмитасида ўтказилган йиғилишида. Аввалроқ у Россиядаги Гамалея марказининг «Спутник V» вакцинаси «британча» штаммига қарши юқори даражадаги самарадорликни намойиш этганини айтган эди.
Шунингдек, Американинг Novavax биотехнологик компанияси вакцинаси ҳам «британча» штаммга қарши самарали бўлиб чиқди. Буюк Британияда ўтказилган клиник синовларнинг учинчи босқичи натижаларига кўра, вакцинанинг коронавируснинг бирламчи вариантига қарши самарадорлиги 96,4 фоизни, «британча» вариантга қарши самарадорлиги эса 86,3 фоизни ташкил қилган.
Февраль ойида «Росздравнадзор» коронавируснинг «британча» штаммини аниқловчи мамлакатдаги биринчи тест тизими рўйхатдан ўтганини эълон қилди. Тизим Соғлиқни сақлаш вазирлиги қошида Кулаков номидаги Миллий акушерлик, гинекология ва перинаталогия тадқиқот маркази базасида «ДНК-технология» компанияси билан ҳамкорликда яратилган.
Аввалроқ россиялик вирусолог янги вариантнинг тез тарқалаётгани сабабли у аста-секин эски штамм ўрнини босишини айтган эди.
Изоҳ (0)