АҚШ қарийб бир ойдан буён Шимолий Корея билан турли дипломатик каналлар орқали боғлана олмаяпти. Бу ҳақда Reuters президент Жо Байден маъмуриятидаги юқори мансабли амалдорга таяниб маълум қилди, деб ёзади «РБК».
Унинг сўзларига кўра, Оқ уй февраль ўрталаридан буён бир нечта дипломатик каналлар, шу жумладан, Нью-Йоркдаги каналлар орқали Пхеньян билан боғланишга уриниб келган. Аммо Шимолий Корея раҳбарияти бу уринишларни эътиборсиз қолдирган.
«Бугунги кунгача биз Пхеньяндан жавоб олганимиз йўқ», — деди агентлик ҳамсуҳбати.
Reuters маълумотларига кўра, Байден маъмурияти КХДР билан Шимолий Корея ядро дастурини муҳокама қилиш учун боғланишга ҳаракат қиляпти. Пхеньяннинг сукут сақлаши АҚШ давлат котиби Энтони Блинкен ва Пентагон раҳбари Ллойд Остиннинг Жанубий Корея ва Японияга бўлғуси сафари фонида ҳам ташвишни кучайтирмоқда. Ташриф келаси ҳафтага режалаштирилган.
Президент маъмурияти вакили мамлакатлар ўртасида мулоқотнинг йўқлиги Оқ уйнинг КХДРга нисбатан сиёсатига қандай таъсир ўтказиши юзасидан изоҳ беришдан бош тортди. Яқин ҳафталарда Вашингтон Пхеньян билан ҳамкорликнинг асосий жиҳатларини тасдиқлаши керак.
Агентлик манбасига кўра, АҚШ ва Шимолий Корея ўртасида фаол мулоқот олиб борилмаётганига бир йилдан ошган.
Сайловолди кампанияси чоғида Байден бир неча марта Шимолий Корея етакчиси Ким Чен Инга нисбатан салбий фикр билдирган. 2020 йил октябрида Трамп билан ўтказилган мунозараларда у КХДР раҳбарини «босқинчи» деб атаган. Унгача, 2019 йилда Филадельфияда сайловчилари олдида нутқ сўзлар экан, бўлғуси АҚШ президенти Ким Чен Ин диктатор ва тиран эканини айтган, Нью-Гемпширда эса уни қотил деб атаган эди.
2021 йил январида Ким Чен Ин Шимолий Корея Меҳнат партиясининг VIII съездида АҚШ КХДРнинг асосий душмани бўлиб қолишини маълум қилган. «Бизнинг ташқи сиёсий фаолиятимиз келажакда инқилобий ривожланишимиз йўлидаги асосий тўсиқ ва энг катта душман бўлган АҚШни йўқ қилиш ва бўйсундиришга қаратилиши керак», — деган эди у. Шу билан бирга, агар Оқ уй ўзининг душманларча сиёсатидан воз кечса, Пхеньян Вашингтон билан муносабатларни нормаллаштиришга тайёр.
Изоҳ (0)