Биткоин нархи тарихда биринчи марта 60 минг доллардан ошди. Бир йил аввал у бундан 15 марта арзонроқ эди

13 март кунги савдолар чоғида биткоин нархи криптовалюта тарихида биринчи марта 60 минг доллардан ошди, деб ёзади Meduza.

Сўнгги бир кеча-кундузда биткоин 6 фоизга қимматлашди. Криптовалюта қиймати бўйича бундан аввалги рекорд 21 февралда қайд этилган, ўшанда битта биткоин нархи 58 минг долларга тенг бўлган эди.

Эслатиб ўтамиз, биткоин 2017 йилда криптовалюталарга қизиқишнинг ошиши фонида бир йилда 20 баравар қимматлади, шундан кейин унинг курси тезлик билан пасайишни бошлаган. 2018 йилнинг июнь ойида биткоин нархи 6 минг доллардан қимматроқ бўлган, 2019 йилнинг бошида эса унинг нархи 3,5 минг долларгача пасайган. Шундан сўнг биткоин нархи яна ошишни бошлаган.

Бундан роппа-роса бир йил аввал — 2020 йил 13 март куни биткоин нархи энг паст кўрсаткичга тушиб, 4 минг долларга тенглашган эди. Шундан кейин унинг қиймати турғунлик билан ўсди — март охирига келиб у 6,8 минг, 2020 йил ўрталарига келиб — 9,2 минг, 2021 йил 1 январига келиб эса 29 минг долларга етди.

Декабрь ўрталарида биткоин нархи 5 минг долларга ошган эди. 16 декабрь куни криптовалюта қиймати биринчи бор бир суткада 12 фоизга қимматлашиб, 20 минг долларлик чегарадан ўтиб кетган. 21 декабрь куни биткоин курси 24 минг доллардан ошган, кейинги бир неча кун давомида эса 24,6 минг долларлик оралиқда сақланган. 26 декабрь куни эса биткоин нархи биринчи бор 25 минг доллардан ошиб кетганди.