Таниқли таҳлилчи Мин-Чи Куо Apple компанияси яратиш устида иш олиб бораётган янги маҳсулот ҳақида маълумот берди — гап узоқ келажакдаги технология ҳақида кетмоқда. Унинг сўзларига кўра, 2030 йилларга бориб компания атроф-муҳит билан қўшимча реалликда алоқа ўрнатишга қодир «ақлли» линзаларни яратади, деб ёзади Hi-Tech.Mail.ru.
Таҳлилчининг таъкидлашича, яқин ўн йил ичида рақамли контакт линзалар мустақил қурилма сифатида ишлай олмайди. Шу сабабли улар смартфон билан синхронлашади, у орқали барча ҳисоблаш ишлари амалга оширилади, линзанинг ўзи эса экран сифатида ишлайди.
Бу каби контакт линзалар қўшимча ва виртуал реалликка эга замонавий технологик шлемлар ҳамда кўзойнакларнинг мантиқий давомчисига айланади. Ҳозирча у инсонларнинг кундалик ҳаётида қанчалик фойда бериши номаълум, бироқ у профессионалларга: муҳандислар, дизайнерлар, лойиҳаловчилар ва бошқа мутахассисларга ёрдам бериши аниқ. Қўшимча реаллик ёрдамида инсон кўзига виртуал объектларнинг реал тасвирини узатиш мумкин — масалан, янги интерьердаги мебеллар жойлашувини ўлчаб кўриш ёки хонанинг ўзида кенг ҳажмли моделни чизиш.
Мин-Чи Куонинг маълум қилишича, Apple қўшимча реалликка эга ўзининг биринчи шлемини 2022 йилда тақдим этади, 2025 йилда эса ушбу технологияни оддий кўзойнакларга жойлаштиради. 2030 йилларга бориб эса кичкина экранлар контакт линзаларда пайдо бўлиши мумкин.
Аввалроқ швейсариялик олимлар кўзи ожизларнинг кўришига ёрдам берадиган кўз тўрпардаси имплантини яратгани тўғрисида хабар берилганди.
Изоҳ (0)