Халқаро ҳаво қатновлари 2021 йилнинг иккинчи чорагида тиклана бошлаши кутилмоқда. Бу ҳақда Халқаро ҳаво транспорти ассоциацияси (IАТА) раҳбари Александр де Жюньяк маълум қилди, деб ёзади «Интерфакс».
Александр де Жюньякнинг сўзларига кўра, чегаралар очилгандан кейин туристик сафарлар бўйича кескин ўсиш кузатилади. Бизнес сегментининг тикланиш суръати пастроқ кечади, шу билан бирга, йил охирига қадар саёҳатчиларнинг умумий сони барибир пандемия бошланишидан аввалги даражадан паст бўлади.
«Эҳтимол, шу йилнинг май ёки июнь ойларидан кейин авиасаёҳат соҳасида ўзгаришларни кўра бошлаймиз», — деди де Жюньяк. — IАТА’да биз аллақачон давлатлар билан чегараларни очиш юзасидан шартномалар тузиш ва йўл хариталарини ишлаб чиқиш масалалари бўйича иш олиб боряпмиз».
Шунингдек, у ассоциация томонидан ишлаб чиқилган саёҳат паспорти мобил дастури — Travel Pass ҳақида эслатиб ўтди, унда йўловчининг эмлаш тарихи ва COVID-19’га топширган тести натижаларини кўриш мумкин.
Singapore Airlines авиакомпанияси келгуси ҳафтадан бошлаб Сингапур—Лондон йўналиши бўйича Travel Pass’ни синовдан ўтказишни бошлашини эълон қилди.
IАТА’нинг сўнгги маълумотларига кўра, 2021 йилнинг январь ойида дунё бўйлаб авиарейсларда йўловчи ташиш ҳажми 2019 йилнинг январь ойига нисбатан 72 фоизга, халқаро юк ташиш ҳажми эса 85,6 фоизга камайган. 2020 йили пандемия сабабли авиация соҳасида мисли кўрилмаган оғир вазият юзага келгани сабабли, уюшма жорий йилни 2019 йил билан таққослаб келтирди.
Маълумот учун IАТА таркибига дунё бўйлаб 290 та авиакомпания киради, бу глобал ҳаво қатновининг, тахминан, 82 фоизини ташкил қилади.
Аввалроқ 2020 йилда халқаро саёҳатлар сони 1 миллиардга ёки 74 фоизга камайгани, шу тариқа ўтган йил туризм учун кузатишлар тарихидаги энг ёмон йилга айлангани ҳақида хабар берилганди. Хабарга кўра, инқироз сайёҳлик соҳасида 100-120 миллионтагача иш ўринларининг йўқ бўлиб кетиш хавфини келтириб чиқарди, уларнинг аксарияти кичик ва ўрта бизнесга тўғри келади.
Изоҳ (0)