Кадастр агентлигининг Янгийўл тумани бўлими бошлиғи вазифасини бажарувчиси тадбиркордан пора олаётганда ушланди, дея хабар бермоқда Бош прокуратура ҳузуридаги Департамент матбуот хизмати.
Маълум қилинишича, Бош прокуратура ҳузуридаги Департамент томонидан тадбиркорлик субъектларининг ҳуқуқ ва манфаатларини ҳимоя қилиш юзасидан тезкор тадбир ўтказилган.
Тадбирда Кадастр агентлигининг Тошкент вилояти Янгийўл туман бўлими бошлиғи вазифасини вақтинча бажарувчи С.Ж. «Р.М.» МЧЖ томонидан қурилган «Автомобильларга газ тўлдириш компрессор» шохобча биносининг кадастр ҳужжатларини тайёрлаб бериши эвазига, жамият раҳбаридан 10 тонна цемент олиб беришни талаб қилиб, цементни бозор нархида ўртача 10 миллион сўмга ҳисоблаб, дастлаб Cobalt русумли автотранспорт воситаси учун аккумулятор ҳамда 500 АҚШ долларини пора тариқасида олган вақтида ашёвий далиллар билан ушланган.
Мазкур ҳолат юзасидан С.Ж.га нисбатан Жиноят кодексининг 210-моддаси (пора олиш) билан жиноят иши қўзғатилиб, тергов ҳаракатлари ўтказилмоқда.
Бундан аввал Сирдарёда Давлат солиқ бошқармаси бўлим бошлиғи 1000 доллар пора билан қўлга тушгани, Жиззахда дарахтларнинг кесилганини яшириш учун пора талаб қилган атроф-муҳитни муҳофаза қилиш ходими ушлангани ҳамда Қўқон давлат педагогика институтига ўқишга киритиб қўйишни ваъда қилиб, 3 минг доллар олган деканга суд ҳукми ўқилгани ҳақида хабар берилганди.
Изоҳ (0)