Самарқандда Туркиядан қўйилган тақиқни бекор қилиш ва Жанубий Кореяга ишга юборишни ваъда қилиб, ўзбекистонликларни чув туширган Туркия фуқароси қўлга олинди. Бу ҳақда ИИВ Тергов департаменти хабар берди.
Маълум қилинишича, 2021 йил 31 январь куни Н.Р.нинг аризаси юзасидан ИИВ ЖҚББ ва ДХХ ходимлари ҳамкорлигида тезкор тадбир ўтказилган. Шу куни соат 14:00 ларда Самарқанд шаҳри Регистон кўчасида жойлашган кўп қаватли хонадонлардан бирида Туркия фуқароси Учар Жума ва унинг танишлари Ўзбекистон фуқаролари 23 ёшли эркак М.П., 36 ёшли аёл Д.Э. ва 25 ёшли аёл З.Н. шартли мижоз сифатида жалб қилинган Н.Р.га уни Туркиядаги Ucar uluslararasi danismanlik international consulting ширкати орқали 4200 доллар эвазига Жанубий Кореяга ишлаш учун юборишини маълум қилиб, дастлабки тўлов сифатида 2000 доллар олган вақтида ушланган.
Ҳолат юзасидан Самарқанд шаҳри бўйича ИИО ФМБ ҳузуридаги тергов бўлими томонидан Жиноят кодексининг 168-моддаси 2-қисми «б» банди (бир гуруҳ шахслар томонидан олдиндан тил бириктириб фирибгарлик содир этиш) билан жиноят иши қўзғатилган.
Олиб борилган тергов ҳаракатлари давомида ижтимоий тармоқларда Учар Жума ва М.П. Ucar uluslararasi danismanlik international consulting ширкати орқали Туркия томонидан қўйилган тақиқни бекор қилиш, чет эл давлатларига ишга юбориш ҳақида YouTube, Tik Tok ижтимоий тармоқларига эълон жойлаштириб, Андижон, Самарқанд ва Тошкент шаҳрида яшовчи фуқаролардан алдов йўли билан жами 6000 доллар олгани аниқланган.
Ҳозирда мазкур жиноят иши юзасидан тергов ҳаракатлари ИИВ ҳузуридаги Тергов департаменти томонидан олиб борилмоқда.
Изоҳ (0)