Тошкент вилоятида аҳолини ичимлик суви билан таъминлаш учун ажратилган пулдан 722 млн сўм талон-торож қилинди

Тошкент вилоятининг Бекобод туманида аҳолини ичимлик суви билан таъминлаш учун ажратилган маблағларни талон-торож қилган МЧЖ раҳбарларига нисбатан жиноят иши қўзғатилди. Бу ҳақда Бош прокуратура ҳузуридаги Иқтисодий жиноятларга қарши кураш департаменти хабар берди.

Департаментнинг Бекобод туман бўлими томонидан ўтказилган терговга қадар текширувларда «С.» ва «Е» МЧЖ томонидан «Сувоқова» ДУК Тошкент вилоят ҳудудий бошқармаси билан аҳолини ичимлик суви билан таъминлаш юзасидан тузилган пудрат шартномасига асосан амалга оширилган ишлар бўйича тузилган ҳужжатларга сохта маълумотлар киритилгани аниқланган.

Амалда бажарилмаган ишларни қўшиб ёзиш орқали «С.» МЧЖ томонидан 489 миллион сўм, «Е» МЧЖ томонидан 233 миллион сўм бюджет маблағлари талон-торож қилинган.

Мазкур ҳолатлар юзасидан ҳар икки МЧЖ раҳбарлари ва бошқаларга нисбатан Жиноят кодексининг 167-моддаси (талон-торож қилиш), 228-моддаси (ҳужжатларни қалбакилаштириш) ва 209-моддаси (мансаб сохтакорлиги) билан жиноят ишлари қўзғатилиб, тергов ҳаракатлари ўтказилмоқда.

Аввалроқ Бухорода ичимлик суви тармоқларини реконструкция қилишда 254 миллион сўм бюджет маблағлари талон-торож қилингани ҳақида хабар берилган эди.