Эмланганларда тромблар пайдо бўлиши билан боғлиқ бир нечта ҳолатлар ҳақидаги маълумотлардан кейин Дания AstraZeneca вакцинасидан фойдаланишни икки ҳафтага тўхтатиб қўйди. Бундай ҳолатлардан бири ўлим билан тугади, деб ёзади Meduza.
Мамлакат ҳукумати тромблар пайдо бўлиши ва вакцинация ўртасида бевосита алоқа ўрнатилганича йўқлигини таъкидлади. Европа дори воситалари агентлиги текширув ўтказишини маълум қилди, аммо вакцинанинг афзаллиги ҳар қандай ҳолатда унинг хавфларидан устун эканлигини қайд этди ва AstraZeneca вакцинасидан фойдаланишни давом эттириш мумкинлигини таъкидлади.
AstraZeneca фармкомпаниясининг ўзи эса вакцинадан воз кечилаётган бир пайтда ўз дориси беморлар томонидан яхши қабул қилинаётгани ва яхши самарадорлик кўрсатаётганини маълум қилди. «Беморларнинг хавфсизлиги AstraZeneca учун олий приоритет ҳисобланади. Вакцинанинг хавфсизлиги клиник синовларнинг учинчи босқичида кенг ўрганилган. Экспертлар баҳосидан ўтган маълумотлар вакцина умуман олганда яхши қабул қилинишини тасдиқлайди», — дейилади компания хабарида.
Даниянинг ортидан, AstraZeneca дориси билан эмлашни тўхтатиш ҳақидаги қарорларни Норвегия ва Исландия ҳам қабул қилди. Ушбу мамлакатлар ҳукуматлари қайд этишича, у ерларда иккиламчи таъсирлар билан боғлиқ ҳолатлар кузатилмаган, эмлашнинг тўхтатилиши эса Даниядан олинган маълумотга асосланган.
11 март куни Италия ҳам AstraZeneca’дан фойдаланишни тўхтатиб қўйди. Бу 43 ёшли эркакнинг ўлимидан кейин юз берди: у вакцинациянинг эртаси куни юрак тўхтаб қолишидан вафот этди — ҳукумат ушбу икки воқеанинг бир-бирига боғлиқлигини аниқлаштирмоқчи.
7 март куни Австрияда муайян бир партиядан AstraZeneca’ни қўллаш тақиқланганди, бунга эмланган аёллардан бири қон ивишининг бузилишидан вафот этгани, яна бирида ўпка артерияси тромбоэмболияси аниқлангани сабаб бўлган. Ушбу партиядан Европа Иттифоқининг 17 та мамлакатига вакциналар юборилган бўлиб, Австриядан кейин ушбу партиядаги вакцинадан фойдаланмаслик қарори ҳақида Люксембург, Эстония, Латвия ва Литва ҳам эълон қилган. Эстония, шунингдек, тромбоз хавфи юқори бўлган беморларга умуман AstraZeneca вакцинаси билан эмланмасликни тавсия қилган.
Айни пайтгача Европада беш миллионга яқин одам AstraZeneca билан эмланган, тромблар пайдо бўлиши 30 та ҳолатда кузатилган.
AZD1222 вакцинаси AstraZeneca фармацевтика компанияси мутахассислари томонидан Оксфорд университети олимлари билан биргаликда ишлаб чиқилган. Бу векторли вакцина ҳисобланади. Векторли вакциналарнинг ишлаш принципи шундаки, улар таркибида заифлашган зарарсиз вирус ва коронавирус генининг янги тури мавжуд.
Изоҳ (0)