Швециялик экология фаоли Грета Тунберг АҚШ президенти Жо Байденнинг иқлим инқирози билан боғлиқ ҳаракатларини танқид қилди. Бу ҳақда MSNBC телеканалига таяниб Tengrinews хабар берди.
18 ёшли Тунбергнинг айтишича, АҚШ президенти иқлим ўзгаришига етарлича эътибор қаратмаяпти. Унинг фикрига кўра, Байден бу масаладан атроф-муҳитга чинакам ёрдам бериш учун эмас, балки сиёсий манипуляция учун фойдаланмоқда.
«Мен оддий ўспиринман, шунинг учун бундай баҳолар бериш ваколатига эга эмасман. Бу борада менинг фикрим аҳамиятсиз. Илм-фанни ва Байденнинг сиёсати Париж келишувига мос келадими ёки йўқми яхшироқ кўриб чиқинг, ҳароратни 1,5 даражадан пастроқ, ҳаттоки 2 даражада ушлаб туришга диққатингизни қаратинг. Шунда бу етарли эмаслигини яққол кўришингиз мумкин», — деди Тунберг.
https://twitter.com/GretaThunberg/status/1368998425220554756
У Байденга «иқлим инқирозини ҳақиқий инқироз сифатида кўриб чиқишни» маслаҳат берди.
«Агар сиз иқлим инқирозини инқироз деб ҳисобламасангиз, қандай қилиб сайловчиларнинг қўллаб-қувватлашига умид боғлашингиз мумкин. Одамларнинг ўзлари буни инсониятга таҳдид деб айтсада, улар шунчаки иқлим инқирозини сиёсат деб билади», — дея хулоса қилди экология фаоли.
Бундан ташқари, Жо Байденнинг «Иқлим инқирозидан чиқиш учун аҳоли саломатлигини, атроф-муҳитни муҳофаза қилиш ва илм-фанни тиклаш тўғрисида»ги фармонни имзолагани учун унга қарши 12 та штат вакиллари судга даъво билан мурожаат қилган эди.Даъвони Миссури штати бош прокурори Эрик Шмитт қўзғатган, кейинчалик унинг Арканзас, Аризона, Индиана, Канзас, Монтана, Небраска, Огайо, Оклахома, Жанубий Каролина, Теннесси ва Юта штатларидаги ҳамкасблар ҳам даъвога қўшилган.
Эслатиб ўтамиз, Байден президент сифатида иш бошлаган биринчи куниданоқ Қўшма Штатларни углерод газларини тубдан камайтиришни назарда тутадиган Париж иқлим шартномасига қайтиши тўғрисидаги фармонни имзолаган эди.
Изоҳ (0)