Қўқон давлат педагогика институтига ўқишга киритиб қўйишни ваъда қилиб, 3 минг доллар олган деканга суд ҳукми ўқилди

Қўқон давлат педагогика институтига ўқишга киритиб қўйиш учун 3 минг доллар пора олган деканга суд ҳукми ўқилди.

Бу ҳақда хабар берган Фарғона вилоят суди судьяси Бекзод Ҳайдаровнинг маълум қилишича, Қўқон давлат педагогика институтининг табиий фанлар факультети декани лавозимида ишлаган В.У. фуқаро Г.И.га ушбу олий таълим муассасасининг жисмоний маданият факультетига ўқишга киришида ёрдам беришини ваъда қилган. Декан ушбу институтнинг ички назорат ва мониторинг бўлими услубчиси вазифасида ишловчи Х.Б. билан олдиндан жиноий тил бириктириб, фуқародан 3 минг доллар талаб қилган.

Бош прокуратура ҳузуридаги департаментнинг Қўқон шаҳар бўлими ва ДХХ ходимлари ҳамкорлигида ўтказилган тезкор тадбирда институт декани ва услубчиси талаб қилинган пулларни олаётган вақтида ушланган.

Жиноят ишлари бўйича Данғара туман суди ҳукмига кўра, В.У. Жиноят кодексининг тегишли моддаларига асосан бир йил муддатга мансабдорлик ва моддий жавобгарлик лавозимларида ишлаш ҳуқуқидан маҳрум қилинган. Шунингдек, унга нисбатан 44 миллион 600 минг сўм жарима жазоси тайинланган.

Х.Б. эса бир йил моддий жавобгарлик ва мансабдорлик лавозимларида ишлаш ҳуқуқидан маҳрум қилиниб, 16 миллион 725 минг сўм жаримага тортилган.