Хоразм ва Жиззахда фуқароларга ер олиб беришни ваъда қилиб, улардан пул ундиришни мақсад қилган шахслар ушланди, дея хабар қилмоқда Бош прокуратура ҳузуридаги Департамент.
Қайд этилишича, Бош прокуратура ҳузуридаги Департаментнинг Ҳазорасп туман бўлими томонидан тезкор тадбир ўтказилган.
Тадбир давомида фуқаро В.Р. ва У.Р. олдиндан тил бириктириб, фуқаро О.га турар жой биносини қуриш учун туман ҳокимлиги захирасидан 1200 квадрат метр ер майдонини юқори лавозимда ишловчи танишлари орқали олиб бериш эвазига 5000 АҚШ долларини олган вақтида ашёвий далиллар билан ушланган.
Яна бир ҳолат Департамент ҳамда ДХХнинг Жиззах вилояти бошқармалари томонидан ўтказилган тезкор тадбирда аниқланди.
Ғаллаорол тумани «О.» сув истеъмолчилари уюшмаси раиси Ф.Т. ер сотишга ваколати бўлмаса-да, фуқаро И.нинг ишончига кириб, унга уюшма ҳудудидан ғаллачиликка ихтисослашган 3 гектар сувли ҳамда 20 гектар лалми ер майдонларини фирибгарлик йўли билан сотишни режалаштириб, олдиндан келишилган 50 миллион сўмни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Бундан аввал ўзини маҳалла раиси сифатида таништириб, Сергелидан имтиёзли нархларда уй олиб беришни ваъда қилган шахсга жиноят иши қўзғатилгани, Термизда 3 минг доллар эвазига икки кишини ҳарбий қисмга ишга жойлаштириб қўймоқчи бўлган шахс ушлангани ҳамда Тошкентда 4 минг доллар эвазига Миллий гвардия тизимига ишга киритиб қўйишни ваъда қилган шахс қўлга олингани ҳақида хабар берилганди.
Изоҳ (0)