Фарғонада фуқаронининг 1,8 миллиард сўмини ўзлаштирган 70 ёшли шахсга ҳукм ўқилди, дея хабар бермоқда ЎзА.
Маълум қилинишича, 70 ёшли фуқаро Э.Ҳ. 2012 йилда Бешариқ тумани Пастки Яккатут қишлоғида яшовчи Д.А. билан танишиб қолади. Янги танишига у ўзининг асл исм-шарифини яшириб, Марғилон шаҳрида яшовчи Н.Б. эканлигини айтиб, Тошкент шаҳар ДХХ бошқармасида полковник ҳарбий унвони билан ишлашини маълум қилади.
Э.Ҳ. танишган одамига гап орасида ҳар қандай хизматга тайёрлигини айтиб ўтади. Бироз вақт ўтиб, у Д.А.дан 10 минг АҚШ доллари бериб туришини, ўн кун ичида қайтариб беришини айтиб, ушбу пулларни олган. Пулни ўз вақтида қайтариб, шу орқали унинг ишончига кирган. У бу орада Д.А.га бозор-ўчарлар, чойхонада жой айтиб, турли ишлар ҳам буюриб туради.
Д.А. «Бек каратэ» клуби раҳбари ва фермер хўжалиги бошлиғи ҳам эди. Бундан хабар топган Э.Ҳ. 2013 йил ноябрь ойларида Нидерландия давлатидан зотдор қора моллар олиб келаётганлигини, агар унга ҳам керак бўлса, олиб келиб беришини айтган.
Анчадан буён чорвачиликни йўлга қўйишни ўйлаб юрган Д.А. бу таклифга кўниб, 200 бош голланд зотдор қора моли учун 1 миллиард 800 минг сўм пулларни унинг қўлига тутқазди. Бу пулларни Э.Ҳ. шахсий эҳтиёжлари учун ишлатиб юборган.
Жиноят ишлари бўйича Бешариқ туман суди томонидан мазкур жиноят иши кўриб чиқилиб, Э.Ҳ. Жиноят кодекси 168-моддаси 3-қисмининг «а» банди (кўп миқдорда фирибгарлик) билан айбли деб топилди. Узил-кесил 6 йил 2 ой муддатга озодликдан маҳрум қилиш ва 11 миллион 938 минг 500 сўм жарима жазоси тайинланди. Ундан жабрланувчи Д.А. фойдасига 1 миллиард 800 минг сўм моддий зарар ундириш белгиланди.
Аниқланишича, 1995 йилда қотиллик жинояти учун Э.Ҳ.га 16 йил муддатга озодликдан маҳрум қилиш жазоси тайинланган. 2001 йилда ўталмай қолган жазосидан амнистия қарорига асосан озод қилинган.
Шунингдек, у ўтган давр мобайнида 5 марта фирибгарлик жиноятини содир этганлиги учун судланган.
Бундан аввал Термизда 3 минг доллар эвазига икки кишини ҳарбий қисмга ишга жойлаштириб қўймоқчи бўлган шахс ушлангани, Бўстонлиқда ўзганинг 15 сотих ерини 33 минг долларга сотишга уринган шахслар қўлга олингани ҳамда Фарғонада фуқаронинг 71 200 доллари ва 1 миллиард сўмдан ортиқ пулларни ўзлаштириб, хорижга чиқиб кетган шахсга жиноий иш очилгани ҳақида хабар берилганди.
Изоҳ (0)