Андижонда гиёҳванд модда савдосида иштирок этган 4 нафар шахс ушланди. Уларнинг 2 нафари — хориж фуқаролари. Бу ҳақда Тергов департаменти хабар қилди.
Таъкидланишича, 2021 йилнинг 5 март куни соат 18:00 ларда вилоят ИИБ жиноят қидирув бўлими ходимлари томонидан тезкор тадбир ўтказилган. Тадбир давомида 36 ёшли Э.М. Қирғизистон фуқароси 48 ёшли У.Р. билан Асака тумани «Кужган» МФЙ ҳудудида шартли равишда мижоз сифатида жалб қилинган фуқарога 18 000 АҚШ доллари эвазига 1830 грамм гашиш гиёҳвандлик моддасини сотган вақтида ушланган.
Қўлга олинганларни Олтинкўл тумани «Жалабек» МФЙ ҳудудида жойлашган чойхонада 52 ёшли Х.Й. ҳамда Россия фуқароси 36 ёшли М.М. кутиб ўтирганлиги аниқланиб, уларнинг ёни кўздан кечирилганда, жами 0,78 грамм гашиш гиёҳвандлик моддаси холислар иштирокида расмийлаштириб олинган.
Мазкур ҳолат юзасидан Асака тумани ИИБ ҳузуридаги тергов бўлими томонидан У.Р., Э.Р., М.М. ва Х.Й.га нисбатан Жиноят кодексининг 273-моддаси 5-қисми (гиёҳвандлик воситалари, уларнинг аналоглари ёки психотроп моддаларни кўп миқдорда қонунга хилоф равишда сотиш) билан жиноят иши қўзғатилиб, процессуал тартибда ушланган.
Ҳозирда тергов давом этмоқда.
Маълумот учун, бу турдаги жиноятлар учун Жиноят кодексининг нормаларига кўра, 10 йилдан 20 йилгача озодликдан маҳрум қилиш жазоси тайинланади.
Бундан аввал Россия турли жиноятларда айбланган тўрт нафар шахсни Ўзбекистонга топширгани, Ўзбекистонга 1,7 кг гиёҳвандлик воситаларини ошқозонида олиб ўтмоқчи бўлган шахслар қўлга олингани ҳамда Тошкент вилоятида гиёҳванд моддаларининг ноқонуний савдоси билан шуғулланувчи гуруҳ аниқлангани ҳақида хабар берилганди.
Изоҳ (0)