Ўзбекистонлик ёш архитекторлар жамоаси «ЦУМ» қаршисидаги боғ ёнида қад ростлайдиган Мустақиллик монументи бўйича ўз вариантларини тақдим этди. Бу боғ ва 30 та стилизацияланган устундан иборат «экологик» архитектура ечими ҳисобланади, деб хабар беради «Подробно».
Лойиҳа дизайни устида архитекторлар Тахмина Тудиалиева, Ҳусниддин Турсунқулов ва Исломбек Ўразбоев ишлаган бўлиб, улар халқаро архитектура танловларида муваффақиятли иштирок этиб келади.
«Архитектор сифатида биз аҳоли ва ҳукумат талабларини ҳисобга олган ҳолда ‘Истиқлол’ монументини яратиш бўйича ‘экологик’ архитектура ечимини таклиф этишни ўз бурчимиз деб ҳисоблаймиз. Боғ ҳудудида монумент учун ажратилган майдонча ободонлаштириш ва маконнинг эстетик ечимига муҳтож. Ҳукуматнинг ушбу майдончага Мустақиллик мавзусини бериш ниятини инобатга олган ҳолда, биз анъанавий мавзуларга мос 30 та стилизацияланган устунларни ўрнатишни таклиф қиламиз, уларнинг ҳар бирига мустақил Ўзбекистоннинг ҳар бир йилида эришилган асосий ютуқлар битилади», — дейди архитекторлар.
Устунлар ўртасида боғ жойлашиб, у ўзида маҳаллий маданиятни ифода этади.
Ҳар бир устуннинг асоси тошдан ясалади, устуннинг шифтга туташадиган юқори қисми эса замонавий талқин билан безатилган ўзбек нақшларидан иборат енгил конструкциядан ташкил топади.
«Боғ ҳудудида узоқ йиллардан бери мавжуд бўлган китоб расталарини қўллаб-қувватлаш мақсадида китоб ўқиш учун кичик архитектура шакллари ва мавзуга оид инсталляциялар ўрнатилади. Шунингдек, бошқа функционал зоналарни такомиллаштириш ҳам кўзда тутилган. Мазкур композиция ‘Мовий гумбазлар’ булварини уйғун равишда тўлдириб, миллий архитектура руҳини қўллаб-қувватлайди», — дейди архитекторлар.
Маълумот учун, 10 март куни Тошкент шаҳар ҳокимлиги «ЦУМ» қаршисидаги боғда мустақиллик стеласини яратиш бўйича танлов натижаларини эълон қилиш керак.
Эслатиб ўтамиз, Ўзбекистон мустақиллигининг 30 йиллигига бағишлаб «Истиқлол» мажмуасини қуриш ва унда «мустақилликнинг моҳияти ва улкан тарихий аҳамиятини акс эттирувчи монументал композиция»ни яратиш Президентнинг 2020 йил 17 декабрдаги фармонида кўзда тутилган эди. Мажмуани барпо этиш жойи сифатида Шароф Рашидов, Ислом Каримов ва Афросиёб кўчалари оралиғида, Марказий универмаг (ЦУМ) қаршисидаги ҳудуд танланган.
Мавзуга доир:
Изоҳ (0)