Деновда ўзига таниш 20 ёшли қиз С.Х.ни олиб қочиб, унга турмушга чиқишга ундаган 28 ёшли йигитга жиноят иши қўзғатилди. Бу ҳақда ИИВ Тергов департаменти хабар берди.
Маълум бўлишича, 4 март куни соат 10:30 ларда Денов тумани «Ўрикзор МФЙ» ҳудудида қизнинг 28 ёшли таниши А.Р. ўзининг Spark’ида унинг олдига келиб тўхтаган. Сўнг икки номаълум шахс билан унга нисбатан куч ишлатиб, автомашинасига ўтиришга мажбур қилган.
Икки нафар шериги йўлда машинадан тушиб қолганидан сўнг, «Менга эрга тегсанг, уйингга олиб бориб қўяман» деб шарт қўйиб, олиб қочиб кетган. Қиз ундан қочиб кетиш мақсадида А.Р.га турмушга чиқишга розилик берган, ота-онасини ҳам рози қилишга ваъда бериб, унинг қўлидан қочиб қутулган.
Шундан сўнг қиз туман ИИО ФМБ бошлиғи номига ариза билан мурожаат қилиб, бўлган воқеани айтиб берган.
Ҳолат юзасидан Денов тумани ИИО ФМБ ҳузуридаги Тергов бўлими томонидан Жиноят кодексининг 136-моддаси (аёлни эрга тегишга мажбур қилиш ёки унинг эрга тегишига тўсқинлик қилиш) билан жиноят иши қўзғатилган. Ушбу моддада базавий ҳисоблаш миқдорининг 25 бараваригача миқдорда жарима ёки 360 соатгача мажбурий жамоат ишлари ёки 3 йилгача ахлоқ тузатиш ишлари ёхуд 1 йилдан 3 йилгача озодликни чеклаш ёки 3 йилгача озодликдан маҳрум қилиш жазоси белгиланган.
Дастлабки тергов давомида А.Р. С.Х.нинг эрга тегиб кетмаслиги учун олиб қочганини, унинг шериклари 25 ёшли З.С. ҳамда 18 ёшли А.Э. эканлигини маълум қилган.
Ҳозирда тергов ҳаракатлари олиб борилмоқда.
Изоҳ (0)