“Moviy gumbazlar” xiyobonidagi 1700 ga yaqin daraxt xatlovdan o‘tkazildi

Toshkent shahar ekologiya va atrof-muhitni muhofaza qilish boshqarmasi hamda poytaxt prokuraturasi tomonidan tuzilgan maxsus ishchi guruh “Moviy gumbazlar” istirohat bog‘idagi daraxtlarni xatlovdan o‘tkazdi. Bu haqda Bioxilma-xillik va muhofaza etiladigan tabiiy hududlar boshqarmasi boshlig‘i Abdurashid Sodirov 18-fevral kuni AOKAda o‘tkazilgan matbuot anjumanida ma’lum qildi.

“Hududda o‘tkazilgan o‘rganishlar natijasiga muvofiq jami 1698 tup har xil turdagi manzarali daraxtlar xatlovdan o‘tkazildi. Bularning hammasi qimmatbaho daraxt navlariga kiradi. Shuningdek, Toshkent ekologiya boshqarmasiga bog‘dagi daraxtlarning kesilishi bo‘yicha ariza kelib tushmagan”, — deydi Abdurashid Sodiqov.

Eslatib o‘tamiz, O‘zbekiston mustaqilligining 30 yilligiga bag‘ishlab “Istiqlol” majmuasini qurish va unda “mustaqillikning mohiyati va ulkan tarixiy ahamiyatini aks ettiruvchi monumental kompozitsiya”ni yaratish Prezidentning 2020-yil 17-dekabrdagi farmonida ko‘zda tutilgan edi. Majmuani barpo etish joyi sifatida Sharof Rashidov, Islom Karimov va Afrosiyob ko‘chalari oralig‘ida, Markaziy univermag (SUM) qarshisidagi hudud tanlangan.

Avvalroq Jahongir Ortiqxo‘jayev “Istiqlol” majmuasini barpo etish masalasi yuzasidan aholi bilan uchrashgani va bog‘dagi bir dona daraxt kesilsa, o‘sha kuniyoq lavozimidan ketishga tayyorligini ma’lum qilgan edi. Shuningdek, poytaxt rahbari Toshkent shahar hokimligiga ishonchsizlik bildirayotganlarga javob qaytargandi.