Самарқандда турмуш ўртоғининг жонига қасд қилган фуқаро 9 йил муддатга озодликдан маҳрум қилинди. Бу ҳақда «Дарё»га Жиноят ишлари бўйича Самарқанд шаҳар суди судьяси Зарифа Аҳмедова маълум қилди.
Хабар берилишича, 2020 йилнинг 15 июнь куни соат, тахминан, 03:30 да Самарқанд шаҳрида яшовчи Э.Г. маст ҳолатда уйига келиб, турмуш ўртоғи Г.Г. билан оилавий келишмовчилик сабаб жанжаллашиб қолган. Жанжал давомида Э.Г. хонада турган ошхона пичоғи билан турмуш ўртоғининг кўкрак қисмига қасддан уриб, ҳаёт учун хавфли бўлган оғир тан жароҳати етказган. Фуқаро Г.Г. кўп қон йўқотиши оқибатида ҳодиса содир бўлган жойда вафот этган.
Жиноят ишлари бўйича Самарқанд шаҳар судида мазкур иш кўриб чиқилди.
Аниқланишича, судланувчи Э.Г. айбига тўлиқ иқрорлик билдириб, 2020 йилнинг 14 июнь куни соат 19:00 да 2,5 литр ҳажмли пиво спиртли ичимлигини яшаш уйи олдида истеъмол қилганлигини, соат тахминан 02:00 да ухлаш мақсадида яшаш уйига кирганлигини, маст ҳолатда турмуш ўртоғининг кўкрак қисмига пичоқ урганлигини баён қилган.
Суд ҳукмига кўра, судланувчи Э.Г. Жиноят кодексининг 104-моддаси (қасддан баданга оғир шикаст етказиш) 3-қисми «д» бандида назарда тутилган жиноятни содир этганликда айбли деб топилиб, 9 йил 7 ой муддатга озодликдан маҳрум қилинган.
Изоҳ (0)