Toshkent shahar hokimligi 13-fevral kuni “Moviy gumbazlar” restorani yonidagi xiyobonda “Istiqlol” majmuasida o‘rnatiladigan stelaning joylashuv o‘rni maketini olib keldi. Hokimlik matbuot xizmatining yozishicha, jamoatchilik vakillari xiyobonga kelib, maket bilan tanishishi mumkin.
Eslatib o‘tamiz, O‘zbekiston mustaqilligining 30 yilligiga bag‘ishlab “Istiqlol” majmuasini qurish va unda “mustaqillikning mohiyati va ulkan tarixiy ahamiyatini aks ettiruvchi monumental kompozitsiya”ni yaratish Prezidentning 2020-yil 17-dekabrdagi farmonida ko‘zda tutilgan edi. Majmuani barpo etish joyi sifatida Sharof Rashidov, Islom Karimov va Afrosiyob ko‘chalari oralig‘ida, Markaziy univermag (SUM) qarshisidagi hudud tanlangan.
11-yanvar kuni Shavkat Mirziyoyev banklar 2021-yilda amalga oshirishni rejalashtirgan yirik investitsiya loyihalarining taqdimoti bilan tanishgan, “Gazeta.uz” ular orasida taqdimotga ko‘ra, “SUM” qarshisida joylashgan majmua loyihasi borligiga e’tibor qaratgandi.
Bu xalq orasida keng muhokamaga va noroziliklarga sabab bo‘ldi. Yangiliklar ostidagi izohlarda foydalanuvchilar poytaxtdagi kam sonli yashil hududlardan biriga teginmaslikni, bu yerga shaharning turli burchaklardan odamlar dam olish uchun kelishini ta’kidlagan. Shundan so‘ng Toshkent shahri aholisi “SUM” qarshisidagi bog‘ni himoya qilish uchun imzo yig‘ishni boshladi. 10-fevral kuni Toshkentdagi “SUM” qarshisidagi bog‘ himoyasi yo‘lida to‘plangan imzolarning birinchi qismi Prezident Xalq qabulxonasiga topshirildi.
Poytaxt hokimligi Toshkent shahar Ekologiya va atrof-muhitni muhofaza qilish boshqarmasi tomonidan “Istiqlol” majmuasi barpo etilishi belgilangan hududdagi ko‘p yillik manzarali daraxtlarni saqlab qolgan hamda hozirgi xiyobon faoliyatiga ta’sir qilmagan holda barpo etilishi, barcha daraxtlar xatlovdan o‘tkazilishi va muhofazaga olinishini ma’lum qildi.
13-fevral kuni bu masala yuzasidan jamoatchilik vakillari bilan bo‘lib o‘tgan uchrashuvda Toshkent shahar hokimi Jahongir Ortiqxo‘jayev “Istiqlol” majmuasi mustaqillikning ramzini aks ettiruvchi stela barpo etilishini ko‘zda tutishi, boshqa hech qanday qurilish inshootlari bo‘lmasligini, bog‘dagi bir dona daraxt kesilsa, o‘sha kuniyoq lavozimimdan ketishini aytdi.
Shuningdek, “Istiqlol” majmuasida o‘rnatiladigan stelaning joylashuv o‘rni maketi taqdim etilishi bildirilgandi.