Андижон вилоятининг Жалақудуқ туманида 50 нафар фуқарога ажратилган субсидия маблағлари талон-тарож қилингани аниқланди, деб хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Маълум қилинишича, «Х.Б.» ишлаб чиқариш кооперативи раҳбари ва Жалақудуқ туман аҳоли бандлигига кўмаклашиш маркази масъул шахслари олдиндан тил бириктириб, тумандаги 50 нафар кам таъминланган ва ишсиз фуқаролар номига субсидия маблағларини ажратиш орқали «Х.Б.» кооперативига 111,5 миллион сўм ўтказган.
Бош прокуратура ҳузуридаги департаментнинг Жалақудуқ туман бўлим томонидан ўтказилган терговга қадар текширувда ушбу маблағлар фуқароларга ҳеч қандай маҳсулот етказмасдан ёки хизмат кўрсатмасдан ўзлаштириш йўли билан талон-торож қилингани аниқланган.
Ҳолат юзасидан Жиноят кодексининг 167-моддаси (талон-торож қилиш) ва 209-моддаси (мансаб сохтакорлиги) билан жиноят иши қўзғатилиб, тергов ҳаракатлари ўтказилмоқда.
Аввалроқ Зангиотада «Ёшлар — келажагимиз» жамғармаси раҳбарлари катта суммадаги кредит маблағларини талон-торож қилгани аниқлангани, Бухорода сектор котиби «темир дафтар»га сохта маълумот киритиб, эҳтиёжмандларга ажратилган пулни ўзлаштиргани, Бухорода қабристонни ободонлаштиришга сарфланиши лозим бўлган пуллар талон-торож қилингани ҳақидаги мурожаат юзасидан прокуратура текшируви бошлангани ҳақида хабар берилган эди.
Изоҳ (0)