Интернетда Apple 23 март куни тақдимот ўтказиши ҳақида маълумотлар тарқалди. Компания нимани намойиш этади?

Канг тахаллуси билан танилган хитойлик машҳур инсайдер Apple’нинг навбатдаги катта тақдимоти икки ҳафтадан кейин — 23 март куни бўлиб ўтишини маълум қилди. Бу компания яқин кунларда ушбу тадбирнинг анонсини бериши кераклигини англатади, деб ёзмоқда Hi-Tech.Mail.ru.

Ҳозирда Apple компаниясининг намойиш этиши керак бўлган қатор янгиликлари мавжуд, бироқ, афтидан, катта анонс бўлмайди. iPad’нинг янги модели намойиш этилиши мумкин, чунки глобал Pro версияси янгиланмаганига икки йилдан ошди. Шунингдек, компания MiniLED-дисплейли илк планшетларини тақдим этишни режалаштираётгани борасида кўплаб ҳисоботлар мавжуд.

Шу билан бирга, компания симсиз наушникларнинг янги авлодини тақдим этиши керак — оддий AirPods’нинг учинчи версияси ва бироз қимматроқ бўлган AirPods Pro’нинг иккинчи версиясини. Интернетда ҳозирда янги наушникларнинг сурати тарқалиб улгурган. Бундан ташқари, компания буюмларнинг ўғирланиши ва йўқолишидан ҳимояловчи «ақлли» AirTag нишонини намойиш этиши лозим, Apple унинг тақдимотини икки йилдан буён кечиктириб келмоқда.

Мазкур тақдимотдан янги смартфонларни кутиш керак эмас. iPhone 12 линейкаси ўтган кузда тақдим этилган, «ҳамёнбоп» iPhone SЕ’нинг янги версияси эса ҳали чиқадиганга ўхшамайди.

Аввалроқ Apple компанияси 6G технологияларини ишлаб чиқиш учун ходимлар ёллашни бошлагани тўғрисида хабарлар тарқалганди.