Kang taxallusi bilan tanilgan xitoylik mashhur insayder Apple’ning navbatdagi katta taqdimoti ikki haftadan keyin — 23-mart kuni bo‘lib o‘tishini ma’lum qildi. Bu kompaniya yaqin kunlarda ushbu tadbirning anonsini berishi kerakligini anglatadi, deb yozmoqda Hi-Tech.Mail.ru.
Hozirda Apple kompaniyasining namoyish etishi kerak bo‘lgan qator yangiliklari mavjud, biroq, aftidan, katta anons bo‘lmaydi. iPad’ning yangi modeli namoyish etilishi mumkin, chunki global Pro versiyasi yangilanmaganiga ikki yildan oshdi. Shuningdek, kompaniya MiniLED-displeyli ilk planshetlarini taqdim etishni rejalashtirayotgani borasida ko‘plab hisobotlar mavjud.
Shu bilan birga, kompaniya simsiz naushniklarning yangi avlodini taqdim etishi kerak — oddiy AirPods’ning uchinchi versiyasi va biroz qimmatroq bo‘lgan AirPods Pro’ning ikkinchi versiyasini. Internetda hozirda yangi naushniklarning surati tarqalib ulgurgan. Bundan tashqari, kompaniya buyumlarning o‘g‘irlanishi va yo‘qolishidan himoyalovchi “aqlli” AirTag nishonini namoyish etishi lozim, Apple uning taqdimotini ikki yildan buyon kechiktirib kelmoqda.
Mazkur taqdimotdan yangi smartfonlarni kutish kerak emas. iPhone 12 lineykasi o‘tgan kuzda taqdim etilgan, “hamyonbop” iPhone SE’ning yangi versiyasi esa hali chiqadiganga o‘xshamaydi.
Avvalroq Apple kompaniyasi 6G texnologiyalarini ishlab chiqish uchun xodimlar yollashni boshlagani to‘g‘risida xabarlar tarqalgandi.
Izoh (0)