Арманистон Қуролли Кучлари Бош штаби бошлиғининг собиқ биринчи ўринбосари Тиран Хачатрян республика маъмурий судига даъво аризаси билан мурожаат қилди. У ўзининг истеъфоси тўғрисидаги фармонни ҳақиқий эмас деб топилишни талаб қилмоқда, деб ёзади «РБК».
Даъво аризаси 3 март куни берилган, унинг таркибига бош вазир девони ва Бош штаб учинчи томон сифатида киради.
Маълумот учун, Арманистон Қуролли Кучлари Бош штаби бошлиғининг биринчи ўринбосари Тиран Хачатрян мамлакат бош вазири Никол Пашиняннинг таклифига биноан ишдан бўшатилган. Бунга Хачатрян бош вазирнинг Россияда ишлаб чиқарилган «Искандер» ракета комплексининг самарасизлиги ҳақидаги сўзларини танқид қилгани сабаб бўлган.
23 февраль куни Арманистон бош вазири 1in.am каналига берган интервьюсида 2020 йилнинг кузида Тоғли Қорабоғдаги можаро пайтида Ереван қўллаган «Искандер» ракеталари «портламаган ёки 10 фоиз қисмигина портлаган»ини айтган. Yerevan Today нашри журналистлари Тиран Хачатряндан ушбу баёнотга изоҳ беришни сўраганида, у узоқ кулган ва «бўлиши мумкин эмас» деб жавоб берган.
Хачатрян истеъфога чиққандан сўнг Арманистон Қуролли Кучлари Бош штаби мамлакат бош вазири Никол Пашинян ва ҳукуматнинг зудлик билан истеъфога чиқишини талаб қилиб баёнот берган. Баёнотга имзо чеккан 40 нафар юқори мартабали ҳарбий хизматчининг фикрича, Хачатрян «юзаки ўйланган ва асоссиз сабабларга кўра» ишдан бўшатилган.
Кейинчалик Пашинян унга «Искандер» ракеталари ҳақида нотўғри маълумот берилганини тан олди. Шу билан бирга, у ҳарбийларнинг хатти-ҳаракатларини давлат тўнтаришига уриниш деб атади ва Бош штаб бошлиғини ишдан бўшатишга уринди, аммо Арманистон президенти уни истеъфога чиқаришдан бош тортди. Пашинян Бош штаб раҳбарини «хоин» деб атаб, унинг кетишини талаб қилишда давом этди. Арманистон президенти мамлакат Бош штаби раҳбарининг истеъфосини маъқуллашни иккинчи маротаба ҳам рад этди. Ереванда 25 февралдан буён бош вазир тарафдорлари ва унга қарши бўлганларнинг акциялари бўлиб ўтмоқда.
Изоҳ (0)