Қирғизистон Миллий хавфсизлик давлат қўмитаси президент Садир Жапаровнинг Facebook’даги саҳифасига хакерлик ҳужуми уюштирилгани юзасидан текширув ўтказилишини маълум қилди. Бу ҳақда Kloop агентлиги хабар берди.
Агентликнинг таъкидлашича, киберҳужум чет элдан амалга оширилган. Аввалроқ президент матбуот котиби Галина Байтерек Садир Жапаровнинг Facebook’даги саҳифаси хакерлар ҳужумига учрагани ва унинг аккаунтидаги сўнгги изоҳларга алоқаси йўқлигини айтганди. Бунгача президент аккаунтидан депутат Достон Бекешевга қаратилган салбий изоҳ қолдирилган эди.
3 март куни депутатлар янги Конституция лойиҳасини муҳокама қилди. «Азаттик» нашри Facebook’да мажлисдан олинган видеони эълон қилди, у ерда депутат Бекешев лойиҳани танқид қилиб, уни «Хонституция» деб атаган.
Видеони муҳокама қилиб ёзилган изоҳлар орасида президент шахсий саҳифаси номидан қолдирилган изоҳ ҳам бор. «Бу аҳмоқнинг фақат кўзи эмас, ички дунёси ҳам кўр экан — ёрдамчи», — дейилади изоҳда. Кейинроқ у ўчириб ташланди.
Таъкидланишича, депутат Достон Бекешев 6 ёшида кўриш қобилиятидан тўлиқ маҳрум бўлган.
Маълумот учун 2020 йилнинг 22 октябрида нидерландиялик хакер АҚШнинг собиқ президенти Дональд Трампнинг паролини беш уринишда топиб, унинг Twitter’ига кирган. Пароль maga2020! — Трампнинг сайловолди шиори —Make America great again иборасининг қисқартмаси бўлиб чиққан.
27 октябрь куни кечқурун эса сайловига бир ҳафта қолганда, Дональд Трампнинг сайлов штаби сайти хакерлар ҳужумига учраган. Штаб матбуот котиби Тим Мертоу Twitter’да маълум қилишича, хакерлар махфий ахборотни қўлга кирита олмаган, чунки у аслида сайтда сақланмаган.
The New York Times хабарига кўра, штаб сайти, тахминан, ярим соат давомида ишламаган. Бу пайтда бош саҳифада хакерлар хабари турган — унда улар бир нечта қурилмаларга ҳужум уюштиргани, бу «Трамп ва унинг қариндошларига тегишли маълумотларга тўлиқ йўл очиб бергани» ҳақида айтилади.
Эслатиб ўтамиз, 2020 йилнинг июль ойида Twitter’да энг катта киберҳужум содир бўлган эди. Хакерлар Microsoft асосчиси Билл Гейтс, шунингдек, SpaceX асосчиси ва Tesla бош директори Илон Маскнинг аккаунтларини бузиб кирган.
Бизнесменларнинг аккаунтлари орқали биткоинларни маълум бир ҳамёнга ўтказиш ва криптовалюталарни икки баробар қилиб қайтариш тўғрисида твитлар пайдо бўлган. Тез орада ушбу твитлар ўчирилган, бироқ кейинроқ яна эълон қилинган.
The Verge’нинг ёзишича, фойдаланувчилар Маск ва Гейтснинг твитларида кўрсатилган биткоин-ҳамёнларга 50 минг доллар миқдорида криптовалюта ўтказишга улгурган.
Маълумотларга кўра, Гейтс ва Маскнинг аккаунтларидан ташқари, криптовалюталар нашри — CoinDesk, Binance криптовалюта биржаси ва криптовалюта бозорига тааллуқли бошқа компанияларнинг Twitter’даги аккаунтлари бузиб кирилган. Хакерлар буни қандай амалга оширгани номаълум.
Шунингдек, рэпер Кане Уэст, АҚШ собиқ президенти Барак Обама, Amazon асосчиси Жефф Безос, шунингдек, Apple ва Uber’нинг Twitter’даги расмий аккаунтлари ҳам ушбу хакерлар ҳужумига учраган.
Изоҳ (0)