АҚШ Давлат департаменти қирғизистонлик жиноий авторитет Камчи Колбаевни ҳибсга олишга ёрдам берадиган маълумот учун мукофот миқдорини беш бараварга оширди. Бу ҳақда «Интерфакс» хабар берди.
«АҚШ Давлат департаменти Камчи Колбаевнинг ҳибсга олиниши ва/ёки судланишига хизмат қиладиган ва/ёки Колбаев бошчилигидаги жиноий ташкилотининг молиявий оқимларини бузишга ёрдам берадиган маълумот учун мукофот пули 5 миллион долларга кўтарилганини эълон қилади», — деди АҚШ Давлат департаменти вакили Нед Прайс.
Аввалроқ Колбаев ҳақида маълумот учун мукофот 1 миллион долларни ташкил этган эди.
Давлат департаментининг аниқлик киритишича, 2000 йилда Колбаев жиноий гуруҳ таркибидаги ўзининг собиқ хўжайинини ўлдиришга уриниш ва яна икки кишининг ўлимида айбланиб судланган. Мазкур жиноятлар учун Колбаев 25 йилга озодликдан маҳрум қилинган, аммо олти йил ўтгач, қамоқдан қочиб кетган. 2008 йилда у Москвада жиноятчиларнинг махфий йиғинида жиноий тўда бошлиғи деб эълон қилинган.
Мавзуга доир: АҚШ ФҚБ президент сайловига аралашишда айбланаётган россиялик ҳақидаги маълумот учун 250 минг доллар мукофот ваъда қилди
АҚШ Молия вазирлиги маълумотларига кўра, «Биродарлик доираси» халқаро жиноий гуруҳига кирувчи Колбаев порахўрлик, одам савдоси ва бошқа ноқонуний фаолиятлар билан шуғулланган.
Сўнгги марта Колбаев 2020 йил 22 октябрда Бишкек шаҳрида ҳибсга олинган. 2021 йил, 24 февраль куни Бишкек шаҳрининг Первомайский туман суди Колбаевни ҳибсда сақлаш муддатини 22 мартгача узайтирди. 2 март куни эса Бишкек шаҳар суди ҳайъати унинг қамоқдан қочиб кетмаслиги бўйича эҳтиёт чораларни ўзгартирди.
Изоҳ (0)