Судьялар кенгаши ҳузуридаги тартиб-интизом комиссияси Қирғизистон Олий судининг раиси Гульбар Калиевани жиноий жавобгарликка тортишга кўрсатма берди. Ушбу қарор мамлакат Бош прокуратурасининг таклифига биноан қабул қилинди. Бу ҳақда «Интерфакс» хабар берди.
Калиева коррупцияда айбланмоқда (Қирғизистон Жиноят кодексининг 310-моддаси). Унга нисбатан «Маҳаллий суд» автоматлашган ахборот тизими (ААТ)ни ишлаб чиқиш ва амалга ошириш жараёнида йўл қўйилган коррупция бўйича жиноий иш қўзғатилди.
Комиссия Калиевани вақтинчалик лавозимидан четлатишга ҳам розилик билдирди. Энди бу қарор мамлакат президенти Садир Жапаровга берилади, у эса қарорни маъқуллаш учун парламентга киритади.
Интизом комиссиясининг қарори эълон қилинган кундан бошлаб кучга киради ва шикоят қабул қилинмайди.
Мажлисда Калиеванинг ўзи қатнашмади.
Мажлис Калиеванинг иштирокисиз ўтгани учун у Олий суд матбуот хизмати орқали баёнот тарқатди ва Интизом комиссиясининг қарорини ноқонуний деб атади. Калиева касаллик варақасини бергани ва бу масалани унинг иштирокисиз кўриб чиқмасликни сўраганини эслатди.
«Бундан ташқари, қарор қабул қилишнинг бундай шошилинч амалга оширилгани тушунарсиз, қонунчиликда бу масалани кўриб чиқиш учун тўрт ой муддат белгиланган. Бундай ҳаракатлар қонунга зид», — деб таъкидлади Калиева.
Калиева 2012 йилдан Қирғизистон Олий судининг судьяси ва раис ўринбосари лавозимларида ишлаган. 2018 йилда у Олий суднинг бош судьяси этиб тайинланган.
Аввалроқ Франциянинг собиқ президенти Николя Саркози коррупция иши бўйича бир йилга озодликдан маҳрум қилингани ҳақида хабар берилган эди.
Мавзуга доир:
- Саркози коррупция иши бўйича суд қарори устидан шикоят киритади
- Қирғизистон президенти Facebook’да кўзи ожиз депутат ҳақида ҳақоратли изоҳ қолдирди. Бишкек президент саҳифасига хакерлик ҳужуми уюштирилганини маълум қилди
- Қозоғистон ва Қирғизистон президентлари музокаралар ўтказди ва қўшма баёнот имзолади
Изоҳ (0)