Sarkozi korrupsiya ishi bo‘yicha sud qarori ustidan shikoyat kiritadi

Fransiya sobiq prezidenti Nikolya Sarkozi o‘zining korrupsiya va mansabni suiiste’mol qilganlikda ayblab, qamoq jazosiga hukm qilinishi bilan bog‘liq sud qarori ustidan shikoyat kiritadi. Bu haqda Le Figaro Sarkozining advokati Jaklin Laffonga asoslanib xabar bergan.

Advokat o‘z mijoziga chiqarilgan sud hukmi asoslanmaganligi va xolis emasligini ta’kidlagan. U Sarkozining aybsiz ekanligini isbotlashga urinishini va’da qilgan.

Sud Sarkoziga bir yillik qamoq jazosi va ikki yillik shartli qamoq jazosini tayinlagan. Advokat Tyerri Erzogga va sobiq prokuror Jilber Aziberga ham xuddi shunday jazo tayinlangan. Ular 2014-yildagi “maxfiy eshituvlar” ishi yuzasidan sud qilingan. Tergov shifrlangan aloqa liniyasidagi telefon suhbatlari asosida o‘tkazilgan. Surishtiruv ma’lumotlariga asosan Sarkozi va Erzog Aziberga Monakodan yuqori martabali lavozimni egallashni taklif qilib, undan Fransiyaning boshqa bir sobiq prezidentiga aloqador yozuvlarni olishga uringan.

Yakunda ular bergan va’dasining ustidan chiqa olmagan, biroq mazkur holatda prokuratura amaldagi qonunchilikka ko‘ra baribir korrupsiya holati qayd etilgan deb topgan. Sarkozining advokati asosiy suhbatning ahamiyatsiz qismi sobiq prezident va uning advokati o‘rtasida kechganini qayd etgan.

Bu Fransiyaning harbiy tuzumdan keyingi tarixida sobiq prezidentning sud oldida javob berishi va qamoq jazosiga hukm qilinishi bilan bog‘liq birinchi voqea bo‘ldi. Sarkozigacha 2011-yilda yana bir sobiq prezident Jak Shirak Parij meriyasidagi faoliyati davomida qilgan ishlari uchun sud qilingan. Biroq u sog‘lig‘idagi muammolar sabab hech qachon sudda aybdorlik kursisida o‘tirib, savol-javoblarda ishtirok etmagan.

Mart oyi davomida Sarkozi bilan bog‘liq yana bir sud ishi boshlanishi mumkin. U va yana 13 kishi 2012-yildagi Sarkozining prezidentlik kampaniyasini noqonuniy oliyalashtirganlikda gumon qilinmoqda. Sarkozi boshqargan “Xalq harakati uchun ittifoq” partiyasi saylovoldi kampaniya uchun 42,8 million yevro, ya’ni belgilangan limitdan ikki baravar ko‘p mablag‘ olganligi taxmin qilinmoqda. Shubhali harakatlarga qaramay, Sarkozi 2012-yildagi saylovlarda yutqazgan va sotsialistlar vakili Fransua Olland prezidentlikka saylangandi.

BFM telekanali Parij ijro tribunalining 32-palatasi raisi Sarkoziga tayinlangan qamoq jazosi elektron tasma orqali ijrosi nazorat qilinadigan uy qamog‘iga almashtirilishi mumkinligini ma’lum qilganligi haqida xabar berdi. Mazkur masala maxsus sudya tomonidan ko‘rib chiqiladi, biroq ushbu voqea qachon sodir bo‘lishi so‘roq ostida turibdi.

Sarkoziga nisbatan sud hukmi hali o‘z kuchiga kirmagan va uning advokatlari ixtiyorida apellyatsiya berish uchun 10 kun vaqt bor. Sobiq prezident, uning sobiq advokati Tyerri Erzog va Konstitutsion sudning sobiq sudyasi Jilber Aziberning himoyachilari sud qarori ustidan yuqori instansiyaga murojaat qilishini bildirgan. Ishga aloqador bo‘lgan gumondorlarni hibsga olish masalasi ko‘rilmagan va ular jarayonlar yakuniga yetguniga qadar ozodlikda bo‘ladi.

2020-yil dekabr oyida Fransiya prokuraturasi Nikolya Sarkozini 4 yilga hukm qilishni talab qilayotgani haqida xabar berilgan edi.