Sudyalar kengashi huzuridagi tartib-intizom komissiyasi Qirg‘iziston Oliy sudining raisi Gulbar Kaliyevani jinoiy javobgarlikka tortishga ko‘rsatma berdi. Ushbu qaror mamlakat Bosh prokuraturasining taklifiga binoan qabul qilindi. Bu haqda “Interfaks” xabar berdi.
Kaliyeva korrupsiyada ayblanmoqda (Qirg‘iziston Jinoyat kodeksining 310-moddasi). Unga nisbatan “Mahalliy sud” avtomatlashgan axborot tizimi (AAT)ni ishlab chiqish va amalga oshirish jarayonida yo‘l qo‘yilgan korrupsiya bo‘yicha jinoiy ish qo‘zg‘atildi.
Komissiya Kaliyevani vaqtinchalik lavozimidan chetlatishga ham rozilik bildirdi. Endi bu qaror mamlakat prezidenti Sadir Japarovga beriladi, u esa qarorni ma’qullash uchun parlamentga kiritadi.
Intizom komissiyasining qarori e’lon qilingan kundan boshlab kuchga kiradi va shikoyat qabul qilinmaydi.
Majlisda Kaliyevaning o‘zi qatnashmadi.
Majlis Kaliyevaning ishtirokisiz o‘tgani uchun u Oliy sud matbuot xizmati orqali bayonot tarqatdi va Intizom komissiyasining qarorini noqonuniy deb atadi. Kaliyeva kasallik varaqasini bergani va bu masalani uning ishtirokisiz ko‘rib chiqmaslikni so‘raganini eslatdi.
“Bundan tashqari, qaror qabul qilishning bunday shoshilinch amalga oshirilgani tushunarsiz, qonunchilikda bu masalani ko‘rib chiqish uchun to‘rt oy muddat belgilangan. Bunday harakatlar qonunga zid”, — deb ta’kidladi Kaliyeva.
Kaliyeva 2012-yildan Qirg‘iziston Oliy sudining sudyasi va rais o‘rinbosari lavozimlarida ishlagan. 2018-yilda u Oliy sudning bosh sudyasi etib tayinlangan.
Avvalroq Fransiyaning sobiq prezidenti Nikolya Sarkozi korrupsiya ishi bo‘yicha bir yilga ozodlikdan mahrum qilingani haqida xabar berilgan edi.
Mavzuga doir:
- Sarkozi korrupsiya ishi bo‘yicha sud qarori ustidan shikoyat kiritadi
- Qirg‘iziston prezidenti Facebook’da ko‘zi ojiz deputat haqida haqoratli izoh qoldirdi. Bishkek prezident sahifasiga xakerlik hujumi uyushtirilganini ma’lum qildi
- Qozog‘iston va Qirg‘iziston prezidentlari muzokaralar o‘tkazdi va qo‘shma bayonot imzoladi
Izoh (0)