АҚШ Конгресси Вакиллар Палатаси хавфсизлик хизматининг Капитолийга ҳужум уюштирилиш хавфи ҳақидаги огоҳлантиришлари сабабли 4 март куни ўтказиладиган мажлисни бекор қилди. Бу ҳақда Washington Post газетасига таяниб, «РБК» хабар берди.
Газетанинг таъкидлашича, ўнг қанот радикаллари 4 мартни «ҳақиқий инаугурация куни» деб атаб, ўша куни АҚШнинг собиқ президенти Дональд Трамп иккинчи президентлик муддати учун қасамёд келтиради, деган уйдирмаларни тарқатмоқда. Капитолий полициясининг маълум қилишича, уларда баъзи экстремистларнинг ушбу санада яна Конгрессга киришга уриниш режалари ҳақида маълумот бор.
Хавфсизлик хизмати ушбу маълумотларнинг махфийлигидан келиб чиқиб, тахмин қилинган ҳужум тафсилотларини батафсил очиқламади. Агентлик ўз баёнотида «ҳар қандай кучли таҳдидларга тайёр» эканлигини билдирди.
Шу билан бирга, АҚШ Сенати 4 март кунига белгиланган йиғилишини бекор қилмаслигини маълум қилди.
Аввалроқ АҚШ полициясига келиб тушган огоҳлантирувчи хабарлар ва разведка маълумотлари туфайли Вашингтондаги Капитолий биноси атрофида хавфсизлик чоралари кучайтирилаётгани ҳақида хабар берилганди. Шунингдек, Вашингтондаги тартибни сақлаш учун қўшимча полиция ва Миллий гвардия зобитлари сафарбар этилиши, ҳамда Конгресс биноси атрофига тўсиқлар ўрнатилиши таъкидланган. Бундан ташқари, Конгресс аъзоларининг хавфсиз ҳаракатланишини таъминлаш учун учта маҳаллий аэропорт ва темир йўл станциясига қўшимча кучлар жалб қилинади.
Маълумот учун, Дональд Трампни қўллаб-қувватловчилар томонидан ташкил этилган «Американи қутқариш марши» номли норозилик намойиши иштирокчилари 6 январь куни пойтахт Вашингтондаги Капитолий биносига бостириб кирган эди. Трампни қўллаб-қувватлаш учун уюштирилган намойиш Капитолий штурми билан тугаган. Тўрт киши ҳалок бўлиб, яна бир неча киши тан жароҳати олган. Полиция ходимларидан бири воқеа қурбонига айланган.
Намойишчилар ҳужумидан кейин Капитолийни таъмирлаш учун 30 миллион доллар сарфланиши ҳақида хабар қилинган.
Изоҳ (0)