Германияда карантин режими март ойининг охиригача узайтирилади, аммо расмийлар эпидемиологик вазият имкон берса, чекловларни эртароқ юмшатишга келишиб олди. Бу ҳақда Германия канцлери Ангела Меркель маълум қилди, деб ёзмоқда «РБК».
Умумий карантин режими 28 мартга қадар узайтирилади, аммо чекловларни юмшатиш 8 мартдан бошланиши мумкин. Хусусан, ҳар 100 минг аҳолига 50 тадан камроқ касалланиш ҳолати тўғри келадиган ҳудудларда китоб ва гул дўконлари, шунингдек, боғдорчилик бозорлари очилади. Бундан ташқари, ҳукумат музей, галерея, ботаника боғлари ва ҳайвонот боғларини олдиндан буюртма қилинган якка ташрифлар учун очиши ҳамда дўконларга имтиёзлар жорий қилиши мумкин.
Икки ҳафтадан кейин касалланиш ҳолати камайса, чекловларни юмшатишнинг янги босқичига ўтилиши мумкин, жумладан, коронавирусга тест салбий чиққан кишиларга театр, концерт ва опера залларига, кинотеатрларга ташриф буюриши учун рухсат берилади.
Сўнг яна 14 кун ўтгач, 5 апрелдан кейин тестнинг салбий натижаси талаб қилинмасдан ҳам ёпиқ майдон ва очиқ ҳаводаги ҳар қандай спорт тури билан шуғулланишга рухсат берилиши мумкин.
Чекловларни бекор қилиш тўғрисида қарорларни ҳар бир ҳудуднинг ўзи қабул қилади, деди канцлер. Германия вице-канцлери Олаф Шолз эса коронавирусга қарши эмланганлар учун чекловларни бекор қилиш кераклигини айтди. «Тадқиқотлар шуни кўрсатмоқдаки, эмланганлар энди вирусли касалликларни юқтирмайди, шунинг учун уларда касалланиш хавфи бўлмайди, биз ушбу гуруҳ учун қандай турдаги чекловларни бекор қилиш мумкинлигини муҳокама қилишимиз керак», — деди Шолз. У вакцина қабул қилганларга COVID-19 тестининг салбий натижаси талаб қилинадиган барча жойларга киришга рухсат беришни таклиф қилди.
Германияда локдаун 2020 йилнинг декабрь ойида жорий қилинган эди. Барча муассасалар ёпилиб, фақат озиқ-овқат ва кичик жиҳозлар дўкони, дорихона, банк, почта алоқаси бўлимлари, тиббий клиника ва бошқа бир қатор ташкилотлар ўз фаолиятини давом эттирган.
Мактаблар масофавий таълим шаклига ўтказилган ва болалар боғчасини масофавий таълимга ўтказиш бўйича эса ҳар бир ҳудуднинг ўзи қарор қабул қилган.
Локдаун муддати бир неча бор узайтирилган, охирги марта 10 февраль куни чекловлар 7 мартга қадар узайтирилиши маълум қилинган. Deutsche Wелле нашри хабарига кўра, баъзи федерал штатлар карантин муддатини узайтиришга қарши чиққан, аммо канцлер бу қарорни « босим билан илгари сурган».
Жонс Ҳопкинс университети маълумотларига кўра, пандемия бошидан бери Германияда 2,4 миллион киши коронавирусга чалинган, 71,2 минг киши касалликдан вафот этган.
Изоҳ (0)