Самарқанд ва Саратов биродарлашган шаҳарларга айланди

Ўзбекистоннинг Самарқанд ва Россиянинг Саратов шаҳарлари биродарлашган алоқаларни ўрнатиш тўғрисида келишувни имзолади. Ҳужжатни Самарқанд ҳокими Бобурмирзо Облақулов ва Саратов вилояти губернаторининг иқтисодий масалалар бўйича ўринбосари Алексей Никитин имзолади, деб хабар бермоқда «Gazeta.uz» STV телеканали берган маълумотга таяниб.

Ҳужжат инвестицияларни жалб қилиш, қўшма инвестиция лойиҳаларини амалга ошириш, шаҳарларнинг таълим ташкилотлари ўртасидаги ўзаро алоқаларни қўллаб-қувватлаш, шунингдек, маданият ва туризм соҳасида ҳамкорликни назарда тутади.

«Шартнома, шу билан бирга, пандемия оқибатларини биргаликда бартараф этишга кўмаклашади», — деб қайд этилган хабарда.

Саратов администрацияси сайтида келтирилишича, бугунги кунда Саратов вилоятида 3 000 нафардан ортиқ, Саратов шаҳрида эса 1100 нафардан ортиқ ўзбекистонлик истиқомат қилади. «Ўзбекистон» ўзбек миллий маданий маркази, «Сўғдиёна» ўзбек маданий маркази ва «Турон» ўзбек миллий маданий маркази каби жамоат ташкилотлари фаолият юритмоқда.