Арманистон бош вазири мамлакат бошқарувнинг ярим президентлик шаклига қайтиши мумкинлигини маълум қилди

Арманистон бош вазири Никол Пашинян 2021 йил октябрида конституция бўйича референдум ўтказишни таклиф қилди. Бу ҳақда у Ереванда ўз тарафдорларининг митингида айтиб ўтди, деб ёзади Meduza.

Пашинян бошқарувнинг парламент шаклидан ярим президентлик шаклига қайтиш эҳтимоли ҳақида маълум қилди. Унинг сўзларига кўра, бу мамлакатда барқарорликни кафолатлайди ва «ички сиёсий инқирозлар шаклланиши»га йўл қўймайди.

«Ниҳоят, тан олиш керак, 2015 йилда тузилиб, 2018 йилда кучга кирган конституция бу давр ичида кўплаб камчиликларни аниқлади. Ва бугун биз кўряпмизки, бу конституция, афсуски, кўплаб инқироз имкониятларини ва хавфларни яратмоқда. Октябрда биз референдум ўтказмоқчимиз, унинг натижасига қараб ё янги конституцияни, ё тузатишларни қабул қиламиз ва улар билан бошқарувнинг парламент шаклидан ярим президентлик шаклига ўтамиз», — деди у.

Пашинян, шунингдек, агар парламент мухолифати рози бўлса, навбатдан ташқари парламент сайловларини ўтказишга тайёрлигини билдирди.

«Агар парламент кучлари бизнинг ўтган йил декабрь охири — январь бошида билдирган таклифимизни қабул қилса, унда биз навбатдан ташқари парламент сайловларига тайёрмиз. Сизга иккинчи имкониятни бераман. Юринг, сайловларга борамиз ва халқ кимнинг истеъфосини талаб қилаётганини кўрамиз», — деди бош вазир.

Арманистон бошқарувнинг ярим президентлик шаклидан парламент шаклига 2018 йилда ўтган эди, бунга 2015 йилда бўлиб ўтган конституция бўйича референдум асос бўлган эди. Ислоҳот натижасида президент ваколатлари чекланиб, бош вазир фойдасига қайта тақсимланган эди.

Тоғли Қорабоғдаги урушда мағлубиятга учрагач, Арманистонда сиёсий инқироз давом этмоқда. У 25 февраль куни бош штаб Никол Пашиняннинг истеъфосини талаб қилганидан кейин кучайди. Бунга бош вазир унинг Россия томонидан ишлаб чиқарилган «Искандер» ракеталари Қорабоғда самара бермагани ҳақидаги гапларини танқид қилган бош штаб бошлиғи ўринбосарини ишдан бўшатгани сабаб бўлди.

Пашинян унга «Искандер» ракеталари ҳақида нотўғри маълумот берилганини тан олди. Шу билан бирга, у ҳарбийларнинг хатти-ҳаракатларини давлат тўнтаришига уриниш деб атади ва Бош штаб бошлиғини ишдан бўшатишга уринди, аммо Арманистон президенти уни истеъфога чиқаришдан бош тортди. Пашинян Бош штаб раҳбарини «хоин» деб атаб, унинг кетишини талаб қилишда давом этмоқда. Ереванда 25 февралдан буён бош вазир тарафдорлари ва унга қарши бўлганларнинг акциялари бўлиб ўтмоқда.