АҚШнинг собиқ президенти Дональд Трамп ва унинг рафиқаси Мелания январь ойидаёқ Оқ уйда коронавирусга қарши вакцина қабул қилган. Бу ҳақда Трампнинг маслаҳатчисига таяниб, Axios нашри маълум қилди, деб ёзади «РБК».
Собиқ президент ва унинг рафиқаси қайси турдаги вакцина билан эмлангани ва қанча доза олганига аниқлик киритилмаган. Трамп президентлигининг сўнгги куни, 20 январга қадар, АҚШда Moderna ва Pfizer препаратлари тасдиқланган эди. Ҳозирда мамлакатда Johnson & Johnson компаниясининг вакцинаси ҳам расман маъқулланган.
Эслатиб ўтамиз, Дональд ва Мелания Трамп 2020 йил октябрида коронавирусга чалинган эди. Трамп касалхонада уч кун ётган, шундан сўнг у ўзини яхши ҳис қилаётганини ва касалхонадан чиқиб кетаётганини маълум қилган. Касалхонадан чиққанидан сўнг, Трамп вертолётда Оқ уйга учиб борган ва америкаликларга видеомурожаат ёллаб, уларни коронавирусдан қўрқмасликка чақирган ҳамда ўзини 20 йил аввалгидан яхшироқ ҳис қилаётганини таъкидлаган.
Шу билан бирга, февраль ойида The New York Times (NYT) газетаси Америка ҳукуматининг Дональд Трампда коронавирус қанчалик оғир кечгани тўғрисидаги маълумотларни сир тутганини хабар қилди.
Хабарга кўра, Трампнинг аҳволи «жамоатчиликка маълум қилинганидан» кўра ёмонроқ бўлган. Унинг қонида кислород миқдори кам бўлгани сабабли мутахассислар уни сунъий нафас олдириш аппаратига улашга тўғри келишидан хавотирланган. Трампда, шунингдек, коронавирус пневмонияси билан боғлиқ аломатлар, шу жумладан, ўпка инфильтрацияси белгилари бўлгани айтилмоқда.
Декабрь ойи ўрталарида Трамп коронавирусга қарши вакцинани ҳали қабул қилмаслигини маълум қилган. Шунингдек, у керакли вақтда эмланиш имкониятини «кутаётганини» таъкидлаган.
Изоҳ (0)