Сизнингча пул сарфлаш қийинми? Албатта, йўқ! Голливуднинг қуйидаги уч машҳур актёри ҳам шундай деб ҳисоблайди ва ишлаб топган пулларининг жуда катта қисмини оддий одамлар ҳеч қачон орзу қилолмайдиган нарсаларга сарфлайди.

Жонни Депп

Фото: «Яндекс Дзен»

Жонни Депп, шубҳасиз, иқтидорли актёр, ўйнаган ҳар бир роли учун юқори ҳақ олади. Актёрнинг гонорари йилдан йилга ошиб, харажатлари эса тобора кўпайиб бормоқда. The Management Group компанияси Деппни исрофгарчиликда айблаб, актёр ҳар ойда икки миллион долларга яқин пулни шамолга совураётганини, винонинг ўзига 30 минг доллар сарфлашини маълум қилди.

Маълумотларга кўра, Жонни шахсий авиарейсларига тахминан 200 минг доллар сарфлаган, 14 та турар жойининг харажатлари 75 миллион долларга тушган. Бундан ташқари, қизи учун Кардашьян коллекциясидан нархи 7000 доллар бўлган диван сотиб олган.

«Жонни Д.» фильмидан кадр

Фото: «Яндекс Дзен»

Аммо бу ҳали ҳаммаси эмас! Жонни Депп 200 та санъат асарига, 70 га яқин гитара ва 45 та ҳашаматли машинага эгалик қилади. Актёр шифокори учун тахминан 1,2 миллион доллар, ўзи ва онасини ҳимоя қилиш учун 1 миллион 800 минг доллар сарфлаган. Шунингдек, Жонни Депп фильм суратга олиш жараёнида унга махсус қулоқчин орқали ёрдам бериб туриши учун жуда катта пулга овоз режиссёрини ёллаган. Жоннининг айтишича, буларнинг барчаси унинг энг яхши актёр бўлишига ёрдам берган.

Николас Кейж

Фото: «Яндекс Дзен»

Николас Кейж ҳам пул сарфлашда Деппдан қолишмайди. Унинг ғалати харидларга бўлган иштиёқи ҳар қандай одамни ҳайрон қолдиради. Масалан, Кейж тахминан 300 минг долларлик динозавр бош суягини сотиб олган. Аммо тез орада суяк музейдан ўғирланган экспонат эканлиги маълум бўлгач актёр уни музейга қайтаришга мажбур бўлган. Шунингдек, у қадимги даврга оид айиқнинг бош суягига бир муддат эгалик қилган, лекин биллиард ўйнаётганида уни синдириб қўйган.

Сотиб олган кўчмас мулклари у учун ҳеч нарса эмас: Германиядаги 8 миллион долларлик Бавария қалъаси, 7 миллион долларлик Багам оролларидаги иккита орол, 15 миллион долларлик турар жой, Лас-Вегасдаги 8 миллион долларлик ҳашаматли уй. Актёр серияли қотил Дельфинэ Лалорига тегишли бўлган «Арвоҳлар қалъаси» номи билан машҳур иккита қасрга бир неча миллион доллар сарфлаб, қайтадан таъмирлатган.

«Қуролланган барон» фильмидан кадр

Фото: «Яндекс Дзен»

Николас Кейж 30 та мотоцикл, 50 та машина, 4 та яхта ва битта хусусий самолётга эгалик қилар эди. Бироқ кўп ўтмай, актёрнинг давлатдан 14 миллион доллар қарзи борлиги аён бўлгач Кейж деярли барча мол-мулкини сотди. 2015 йилда Николас банкрот бўлди ва ҳозирда қайта оёққа туриб олиши учун ҳар қандай ролни ўйнамоқда.

Том Круз

Фото: «Яндекс Дзен»

Том Круз исрофгарчилик бўйича энг биринчилардан. Унинг мотоцикл ва автомобилларга бўлган иштиёқи барчага маълум. Актёрнинг гаражида BMW С1000РР, Ducati Desmosedici RR, Confederate Hellcat, Ducati 999 R каби мотоцикллар, шунингдек, энг тезкор ва энг кучли мотоцикллардан бири — Vyrus 987 C 3 4 V бор.

Актёр автопаркида автомобиль моделларидан: классик Buick Roadmaster («Ёмғир одами» фильмидаги машина.), Chevrolet Chevelle SS, Chevrolet Corvette C 1 (1958, Porsche 911, Mercedes-Benz S-Class, BMW 7-Series, Mercedes-Benz CLK-Class, Bugatti Veyron, Ford Mustang Saleen S281, Ford Excursion ўрин олган.

«Уддалаб бўлмас топшириқ: Фантом протоколи» фильмидан кадр

Фото: «Яндекс Дзен»

Ўзидан ташқари Круз қизи Сурига ҳам яхшигина пул сарфлайди. Рождество байрамига Том 6 ёшли қизига Нью-Йоркдаги 13,5 миллион долларлик данғиллама уй ва пони отини совға қилган. Том ва унинг собиқ рафиқаси Кети Холмс ҳар доим қизчага ким энг зўр совға бериш бўйича мусобақалашади. Ажрашганидан кейин Круз беш йилгача қизини кўра олмаган. Шу сабабли бўлса керак, у қизидан ҳеч нарсани аямайди.