Қўшиқчи ва актриса Леди Гаганинг ўғирланган француз булдоглари — Кожи ва Густав қайтариб берилди. Бу ҳақда Лос-Анжелес полицияси ўз Twitter саҳифасида маълум қилган.
Аввал хабар қилинганидек, ўғрилик 24 февраль куни содир бўлган: унинг ёрдамчиси Райан Фишер хонанданинг учта итини сайрга олиб чиққанида қуролланган кишилар ҳужумига учраган.
Ўғрилар Фишерни ярадор қилиб, иккита булдогни олиб кетган, Мисс Асиа исмли учинчи ит эса қочишга муваффақ бўлган ва кейинчалик уни полиция топган.
Associated Press’нинг хабар беришича, итларга зарар етмаган, бир нечта ўқдан ярадор бўлган ёрдамчининг аҳволи ҳам барқарор.
Маълум бўлишича, олиб борилаётган тергов муносабати билан хавфсизлик нуқтаи назаридан исми ошкор қилинмаган аёл итларни олиб келган.
Лос-Анжелес полицияси 26 февраль куни аёл итларни «топиб олганини ва уларни қайтариш учун Леди Гага вакилларига мурожаат қилганини» айтган.
Полиция капитани Жонатан Типпеттнинг айтишича, жониворларнинг ўғирланишида аёлнинг алоқаси йўқ. У Леди Гага итларини қайтариб бериш учун ваъда қилган 500 минг доллар мукофот пулини оладими ёки йўқми, бу ҳам номаълум.
Изоҳ (0)