«Навоий вилоятининг Томди туманидаги 21-мактаб ‘аварийний’нинг ҳам ‘аварийний’ аҳволида» , — дея сўзлаб берди O‘zLiDeP пресс клубида ушбу ҳудуддан Олий Мажлисга сайланган депутат Ақшагул Тулегенова.
«Навоий вилоятининг Томди, Учқудуқ, Конимех ва Зарафшон округидан сайланган депутатман. Таълим соҳасини яхши тушунаман. Эски Томди овулидаги 21-мактаб ‘аварийний’ эмас ‘аварийний’нинг ҳам ‘аварийний’ ҳолатида.
У мактабга кирдимда, жоним ширинлик қилиб, йўлагидан қайтдим. Уёғига ўтмадим. Устимга қулаб тушишидан қўрқдим.
Нимага шундай мактаблар инвестиция дастурига киритилмайди-да, шароити ўртача, яна бир икки йил фойдаланса бўладиган мактаблар дастурга киритилади?
Бунинг битта сабаби бор, шароити ўртача мактаб шундан 5 йил олдин ҳам ремонтдан ўтган мактаб бу йил ҳам нари борса 500 миллион сўм билан ўтади.
21-мактаб эса таъмирланмайди, уни ўрнига фақат янги мактаб қуриш керак. У мактабни реконструкция қилиб бўлмайди. Фақат янги мактаб қуриш керак», – дейди депутат Ақшагул Тулегенова.
Аввалроқ Қашқадарёда 1972 йилда қурилган шийпон мактабда ўқиётган ўқувчилар, Фарғонада таъмирлаш учун давлат дастурини кутаётган қаровсиз мактаб ҳақида хабар берилганди.Шунингдек, Шерзод Шерматов интернетда муҳокамаларга сабаб бўлаётган ачинарли аҳволдаги синфхоналар бўйича муносабат билдирган эди.
Эслатиб ўтамиз, 2020 йил охирида Шавкат Мирзиёев «2021–2023 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида»ги қарорни имзолаган эди. Мазкур қарорга кўра, мамлакатда яна 22 та боғча, 31 та мактаб ва 16 та ОТМ қурилиши белгиланган.
Изоҳ (0)