Hozirda O‘zbekistonda mingdan ziyod maktab filiallari mavjud. Tahlillarga ko‘ra, ularning 300 tasi qo‘lbola usulda aholi tomonidan qurilgan. Bu haqda 24-oktabr kuni AOKAda o‘tkazilgan matbuot anjumanidan so‘ng jurnalistlarga intervyu bergan xalq ta’limi vaziri ta’kidlab o‘tdi, deya xabar bermoqda “Daryo” muxbiri Mirolim Isajonov.

Foto: “Daryo”

Sherzod Shermatovning aytishicha, olis va tog‘li hududlardagi maktab filiallarini ta’mirlash yoki faoliyatini tugatish mahalliy hokimliklar ixtiyorida. Chunki bu bo‘yicha davlat rahbari tegishli topshiriqlarni bergan.

“Oxirgi ikki yil ichida maktablarga nisbatan investitsiya o‘zgardi. Ungacha maktablarga investitsiya kiritilmagan, asosan, kollej va akademik litseylarga investitsiya bo‘lgan. Aholimizning ham, iqtisodiyotimizning ham ahvoli maqtanadigan darajada emas. Buni tan olishimiz kerak, bu berkitadigan narsa emas.

Internetda ko‘p muhokama qilinadigan video va suratlardagi sinfxonalar, asosan, maktab filiallaridagi holat bo‘lib chiqadi. Chekka va tog‘li hududlardagi aholining o‘zi hashar yo‘li bilan qurgan binoni filial qilib ochib qo‘yishgan. Chunki asosiy maktab ularga ancha uzoq, transport muammosi bor. Ko‘p filiallar paxsadan qo‘l uchida qurilgani uchun ahvoli qo‘rqinchli holatda bo‘ladi. Bu kabi filiallar SSR davrida ham, undan keyin ham davlat dasturi bo‘yicha bunyod etilmagan. Aholi sonining oshishi natijasida yoshlar safi ham kengaymoqda. Shu bois ko‘proq maktablar, ta’lim maskanlari qurishimiz lozim. Shuncha yil qilinmagan ishni ikki yilda amalga oshirib bo‘lmaydi.

Ayni paytda mamlakatimizda 1170 ta maktab filiallari bor. Tahlil qilib ko‘rsak, mavjud filiallarda tizimdagi o‘quvchilarning bir foizi tahsil olmoqda. Taxminan, 300 ta filial qo‘lbola usulda qurilgan, ya’ni aholining o‘zi qurib olgan, ta’mirlanmagan. O‘sha qishloqlarda aholi soni ham oz, u yerlarda suv, yo‘l, elektr muammolari ham bor. Lekin doim maktab filiallari muhokama qilinadi. Ota-onalar farzandini uzoq masofadagi maktabga yuborgisi kelmaydi, yo‘l ham juda uzoq. Bu singari muammolarga markazlashgan kompleks asosida yondashish kerak.

Shu o‘rinda aytish kerakki, Prezidentimiz eski ko‘rinishdagi maktab filiallari bo‘yicha mahalliy hokimliklar oldiga vazifa qo‘ygan. Filiallarning barchasini ta’mirlash yoki yopib, asosiy maktab tarkibiga qo‘shib yuborish yoxud to‘laqonli maktabga aylantirish topshirig‘i berilgan. Hokimliklar Prezident topshirig‘ini bajarishsa, filiallar muammosi o‘z-o‘zidan hal bo‘ladi”, — dedi xalq ta’limi vaziri.