Фарғонада дугонасининг сир сақланиши лозим бўлган фото ва видеоларини унинг турмуш ўртоғига кўрсатиш орқали қўрқитиб, пул талаб қилган қиз қўлга олинди, деб хабар беради Тергов департаменти.
Маълумотларга кўра, 20 февраль куни Фарғона шаҳар ИИО ФМБ бошлиғи номига 23 ёшли М.Ф. ариза билан мурожаат қилган. Аризада аёлнинг 23 ёшли З.Қ. исмли дугонаси сир сақланиши лозим бўлган фото ва видеотасвирларни унинг турмуш ўртоғига кўрсатмаслиги эвазига 1500 доллар талаб қилаётгани қайд этилган.
Мурожаат юзасидан ўтказилган тезкор-тадбир давомида Фарғона шаҳрида жойлашган «555» номли кафеда З.Қ. ва 21 ёшли М.И. товламачилик йўли билан М.Ф.дан 1500 долларни олаётган вақтида ашёвий далиллар билан қўлга олинган.
Мазкур ҳолат юзасидан Фарғона шаҳар ИИО ФМБ ҳузуридаги Тергов бўлими томонидан қизларга нисбатан Жиноят кодексининг 165-моддаси 2-қисми «в» банди (товламачилик) билан жиноят иши қўзғатилиб, гумон қилинувчи тариқасида жалб қилинган.
Ҳозирда тергов ҳаракатлари давом этмоқда.
Аввалроқ Фарғонада эркакнинг «ишқий саҳналари»ни тарқатмаслик учун 2 минг доллар талаб қилган аёл ушлангани тўғрисида хабар берилганди.
Мавзуга доир:
- Самарқандда хорижлик фуқародан шахсий расм ва видеоларини интернетда тарқатмаслик эвазига 20 минг доллар талаб қилган аёл қўлга олинди
- Сурхондарёлик йигит қизнинг суратларини тарқатмаслик эвазига унинг акасидан 800 доллар талаб қилди. Йигит бу пулларни онасини даволатиш учун сарфламоқчи бўлган
- Бухорода корхона раҳбарларини қўрқитиб, 30 минг доллар талаб қилган ишчилар ушланди
Изоҳ (0)