Тергов департаменти интернетда Қашқадарёда вилоятининг Китоб туманида амакиваччасини уриб, унинг бир кўзини кўр қилган йигит нима сабабдан жазосиз қолиб келаётгани борасида тарқалган хабарларга муносабат билдирди.
Маълумотларга кўра, 2020 йилнинг 6 март куни Китоб туманида яшовчи фуқаро (аёл) ИИБга ариза билан мурожаат қилиб, 2 март куни қариндоши 25 ёшли Дадахон Х. спиртли ичимлик таъсирида маст ҳолда бўла туриб, унинг ўғли 17 ёшли Шаҳзод У.нинг чап кўзига қўли ҳамда пичоқ билан кўкрак соҳасига урганлигини билдириб, унга нисбатан қонуний чора кўришни сўраган.
Китоб тумани ИИБ ҳузуридаги Тергов бўлими томонидан ўтказилган терговга қадар текширув ҳаракатлари давомида Шаҳзод У. шу куни соат тахминан 08:30 да уйининг кириш дарвозаси тақиллагани сабабли, дарвозани очмоқчи бўлганида Дадахон Х. дарвозани қаттиқ очиб юборгани туфайли дарвоза тутқичи чап кўз соҳасига тегиб жароҳатлагани учун ерга йиқилганини ва қўлида бўлган ошхона пичоғи кўкрак соҳаси олд қисмини кесганлигини маълум қилган. Ушбу ҳолатни Дадахон Х. ҳам тасдиқлаган.
Суд тиббий экспертиза хулосасида, Шаҳзод У. «оғир» тан жароҳати олгани кўрсатилган.
Мазкур ҳолат юзасидан Китоб тумани ИИБ ҳузуридаги Тергов бўлими томонидан Дадахон Х.га нисбатан Жиноят кодексининг 111-моддаси 2-қисми (эҳтиётсизлик орқасида баданга ўртача оғир ёки оғир шикаст етказиш) билан жиноят иши қўзғатилган.
Бир қатор тергов ҳаракатлари ўтказилиб, жиноят иши томонларнинг ярашганлиги муносабати билан Жиноят ишлари бўйича Шаҳрисабз шаҳар судига юборилган ва бу ҳақда ажрим чиқарилган.
Бироқ жабрланувчининг онаси суд ажримидан норози бўлиб, Дадахон Х. фарзандини даволатиш учун етарли маблағни бермагани сабабли ишни ярашув тартибида тугатиш ҳақидаги ажримни бекор қилишни сўраб, жиноят ишлари бўйича Қашқадарё вилояти суди томонидан жиноят ишини кассация тартибида кўриб чиқилишини сўраган. Суднинг ажримига кўра, аввалги ажрим бекор қилиниб, жиноят иши вилоят ИИБ ҳузуридаги Тергов бошқармасига қўшимча тергов ҳаракатларини олиб бориш учун юборилган.
Тергов бошқармаси томонидан ўтказилган тергов ҳаракатларида қуйидагилар аниқланган:
- 2020 йил 2 март куни соат 20:30 да Шаҳзод У.нинг чап кўз соҳасидаги олган «оғир» тан жароҳати хонадонга кириш дарвозаси тегиши оқибатида етказилмагани, балки Дадахон Х. қўлининг мушти билан Шаҳзод У.нинг чап кўз соҳасига бир неча маротаба уриши оқибатида етказилгани. Шунингдек, жанжал вақтида Шаҳзод У.нинг қўлидаги ошхона пичоғини олиб қўйиш жараёнида унинг кўкрак соҳасига пичоқнинг тегиб кетиши оқибатида Шахзод У.га ҳаёт учун хавфли бўлмаган «енгил» тан жароҳати етказилгани аниқланган.
- 2021 йил 8 февраль куни Дадахон Х.га нисбатан Жиноят кодексининг 104-моддаси 2-қисми «в» банди (ўта шафқатсизлик билан қасддан баданга оғир шикаст етказиш) билан айб эълон қилиниб, «қамоққа олиш» тарзидаги эҳтиёт чораси қўлланилган.
- 2021 йил 20 февраль куни жиноят иши Жиноят кодексининг 104-моддаси 2-қисми «в» бандидан 104-моддаси 1-қисми (қасддан баданга оғир шикаст етказиш)га қайта малакаланган.
- 2021 йил 20 февраль куни тергов тамомланиб, айбланувчи ва унинг ҳимоячисига тергов тамомлангани эълон қилиниб, жиноят иши ҳужжатлари билан таништирилган.
- 2021 йил 22 февраль куни жиноят иши тегишли тартибда мазмунан кўриб чиқишлик учун прокуратурага юборилган.
Изоҳ (0)