Facebook Мьянма ҳарбийлари ҳамда улар назорати остидаги давлат идоралари ва оммавий ахборот воситаларига Facebook ва Instagram ижтимоий тармоқларидан фойдаланишни тақиқлади, деб ёзади «Коммерсантъ». Февраль ойи бошида Мьянма ҳарбийлари ҳокимиятни ўз қўлига олиб, мамлакатда бир йилга фавқулодда ҳолат эълон қилган эди.
«Бугун биз Мьянма армияси қўл остидаги ташкилотлар, ҳарбийлар томонидан назорат қилинадиган давлат идоралари ва ОАВнинг Facebook ва Instagram’дан фойдаланишини, шунингдек, платформаларда ҳарбийларга алоқадор тижорат ташкилотлари томонидан реклама жойланишини тақиқлаймиз», — дейилади Facebook баёнотида.
Компания Мьянмадаги вазиятни фавқулодда ҳолат деб ҳисоблашини ва Мьянма жамоати ва аҳолисининг хавфсизлигига бееътибор эмаслигини таъкидлади.
Facebook’нинг баёнотида айтилишича, тақиқ зарурати 1 февраль воқеаларидан сўнг тезлашиб кетган.
Эслатиб ўтамиз, 1 февраль куни Мьянма ҳарбийлари мамлакатда ҳокимиятни қўлга киритганини эълон қилди, улар мамлакат президенти ва бошқа юқори мартабали амалдорларни 2020 йил 8 ноябрда бўлиб ўтган «сайловдаги фирибгарликлар»ни текширмаганликда айблаб, ҳибсга олди. Қуролли Кучлар бош қўмондони Мин Аунг Хлайн мамлакатнинг муваққат президенти этиб тайинланди ва мамлакатда бир йил муддатга фавқулодда ҳолат жорий этилди.
Мамлакатда 20 февраль куни барча тиллардаги Wikipedia интернет-энциклопедияси блокланди. Бунгача Facebook, Instagram, WhatsApp блокланган эди. Бундан ташқари, Мьянмада Интернет вақти-вақти билан ишламоқда. 14 февралда эса у деярли тўлиқ узиб қўйилган эди. Бунга мамлакатнинг йирик шаҳарларида давлат тўнтаришига қарши давом этаётган норозилик намойишлари сабаб бўлган.
Изоҳ (0)