Дубай маликаси Латифа бин Муҳаммад ал-Мактум Британия полициясидан 20 йил аввал катта синглисининг Кембриждан ўғирлаб кетилиши юзасидан қайта текширув ўтказишни сўраб хат ёзди. Бу ҳақда BBC News хабар берди.
Хатда Латифа Кембриж полициясидан терговни қайта бошлашни ва отасининг буйруғи билан қўлга олинган малика Шамсани озод қилишга ёрдам беришни сўрайди. Дўстлари томонидан Кембриж полициясига топширилган маликанинг қўлёзма хатида у Британия ҳукуматини чоралар кўриш ва синглисини ҳимоя қилишга чақиради. Хат 2019 йилда, малика виллада қамоқда бўлганида ёзилган.
«Сиздан бирдан бир нарсани сўрайман, — деб ёзади Латифа, — илтимос, синглимнинг ишига эътиборингизни қаратинг ... ёрдамингиз ва эътиборингиз уни озод қилиши мумкин».
2019 йилда Англия ва Уэльс Олий суди томонидан Дубай амири Муҳаммад бин Рашид ал-Мактум иккала қизини ҳам ўғирлаб, уларни ўз хоҳишларига қарши ушлаб турибди, деб топилган.
BBC ўтган ҳафта Латифанинг эски видеомурожаатини тарқатган. Унда Латифа 2018 йилдаги мамлакатдан қочишга уриниши муваффақиятсиз тугагандан сўнг ўзини виллада мажбуран ушлаб турилгани ҳақида маълум қилган.
Видеомурожаат тарқалганидан бери БМТ Бирлашган Араб Амирликларидан малика тирик экани ҳақида далилларни тақдим этишни талаб қилмоқда.
2000 йил август ойида, Англиянинг Суррей графлигидаги отасининг Лонгкросс мулкидан қочганидан тахминан икки ой ўтгач, Латифанинг катта синглиси Шамса Кембриждан зўрлик билан олиб кетилиб, вертолётда Францияга етказилган, кейин эса шахсий самолётда Дубайга келтирилган. Шамса 18 ёшида ўғирлаб кетилган ва ўшандан бери уни ҳеч қаерда кўришмаган. Айни пайтда аёл 39 ёшда бўлиши керак. Дубай ҳукумати BBC Nеws’нинг изоҳ сўраб юборган саволларига жавоб бермади.
Малика Латифа бин Муҳаммад ибн Рашид ал-Мактум — Дубай ҳукмдори, Бирлашган Араб Амирликларининг бош вазири шайх Муҳаммад ибн Рашид ал-Мактум ва Жазоирлик Хурия Аҳмед ал-Маашнинг қизи. 2018 йил февраль ойи охирида у яхтада Ҳинд океани орқали қочишни режалаштирган. Бироқ яхта Ҳиндистон денгиз кучлари ва БАА махсус хизмат вакиллари томонидан қўлга олиниб, малика Дубайга олиб кетилган.
БААдан қочишдан аввал малика YouTube’га ўзи ва опа-сингиллари ҳақида, улар нега мамлакатдан қочиб кетмоқчи бўлганликлари ҳамда БААда аёлларга нисбатан қандай муносабатда бўлишлари ҳақида ҳикоя қилинган видеороликни жойлаганди.
Малика Латифанинг отаси дунёдаги энг бой ҳукмдорлардан бири ҳисобланади, у Дубай амирлигининг ҳукмдори ва БАА вице-президенти.
Изоҳ (0)